Göndər

                  Göndər

Qardaş, o yerlərin gül-çiçəyindən,

Mənə şehli-şehli dəstələ, göndər.

Arzubulağın zümzüməsiylə,

Quşların səsiylə bəstələ, göndər.

Bənövşə boynunu çöldə buranda,

Lalələr, nərgizlər məclis quranda.

Çıx Haçagədiyə alatoranda,

Sən vaxtı, vədəni üstələ, göndər.

Olmaz bizim elin payız toyundan,

Olmaz Çıqqıllının bumbuz suyundan.

Bir az dələmə tut yerli qoyundan,

Bacar nə göndərsən şəst ilə göndər.

Çoxdandır yemirəm dağ göbələyi,

Torpağın qabarı ağ göbələyi.

Dan üzü tərpənib yığ göbələyi,

Əvəzi istəyən dost ilə göndər.