Ucar gündən günə ucalır
Ucar
gündən günə ucalır
YAP
Sumqayıt təşkilatından mənə zəng vurub dedilər ki, hazırlaş, sabah Ucara gedəcəyik.
Təşkilatın fəallarından biri, xeyriyyəçi hacı Ağamirzə Əhədov bizi doğma kəndində,
Çiynidə ulu öndər Heydər Əliyevin heykəlinin açılışına dəvət etir. Hacı Ağamirzə
Əhədov barədə çox eşitmişəm. Hacı ilə şəxsi tanışlığımız öz yerində.
Sumqayıtda
bir neçə tanınmış, o necə deyərlər sayılıb-seçilən, barmaqla göstərilən Zaman
İsgəndərov, Tofiq Hüseynli, hacı Ağamirzə Əhədov kimi el ağsaqqalları, xeyriyyəçiləri
yaşayırlar.
Hacı
Ağamirzə Əhədov həm də dəyərli ictimaiyyətçidir. O, Sumqayıtın ictimai həyatında
fəal iştirak etməklə yaradıcılıqla da məşğul olur.
Ağmirzə
Əhədov ulu öndər Heydər Əliyevin həyat və fəaliyyətindən bəhs edən “Tufanlardan
keçən ömür ” və Heydər Əliyev siyasi kursunun layiqli davamçısı İlham Əliyevin
fəaliyyətini əks etdirən “XXI əsrin lideri ” kitablarının müəllifidir. Xeyriyyəçi
hacı Ağamirzə Əhədovun xoşuma gələn bir ifadəsi var: “Sağ əl verdiyini, sol əl
bilməməlidir”.
04.05.2012-ci
ildə nümayəndə heyəti YAP-nın həyətindən yola rəvan oldu. Mən xətrini uca tutduğum
Novruz müəllimin maşınında getməli oldum. Söhbət yolu yorar deyib ulularımız.
Biz ordan-burdan söhbət açdıq, problemlərdən yan keçmədik.
Yolboyu
xəyallar aləminə baş vurursan, doğma yurd yada düşür. Bir vaxt bu yolla kəndimə
gedirdim. Hörmət və məhəbbətlə qarşılanırdım. Indi Ağdamdan o yana ancaq
boylanmaq qalır. Novruz müəllimin: -Şair, burda bir çay içəkmi? Sözləri məni xəyaldan
ayırdı. Bizimlə daban-dabana gələn YAP Sumqayıt təşkilatının sədri Asif İmaməliyevin
də sürücüsü maşını çayxananın həyətində əyləndirdi. Hava getdikcə istiləşirdi.
Adam çay yox, sərin bulaq suyu içmək istəyirdi. Mən üzümü dostlara tutdum:
-Ə, bu
istidə çay içmək olar?
Asif
müəllim suala lətifə ilə cavab verdi:
-Moskvada
yanvar ayında qarlı-şaxtalı gündə orada yaşayan rus gəncləri dondurma yeyirmişlər.
Bakıdan Moskvaya getmiş bir nəfər təəccüblənir və deyir:
-Görməmişlər,
belə şaxtada da dondurma yeyərlər?
Sən
demə, gənclərin arasında bizim dili bilən varmış, o, üzünü Bakılıya tutur:
-Qardaş,
günün qızmarında Kürdəmirdə qaynar çayı içə bilirsiniz, biz qışın soyuğunda
dondurma yeyə bilmərik?
Biz
söhbətə nöqtə qoyduq. Gülə-gülə yolumuza davam etdik. Açığını deyim ki, aran
bölgəsində əvvəllər çox olmuşam. Bir vaxtlar Kürdəmir, İmişli, Beyləqan,
Sabirabad və başqa bölgələr yazın burnu qanıyanda allı-güllü yaylaqlara köçərdilər.
Əriməz,
Əyriqar, Qızılboğaz, Alagöllər, Mərcanlı Ağdaban, Leyliqaçan, Qumarxac,
Arxaşan, Muradtəpəsi, Pəriçınqılı və s. həmin
bu yaylaqlara Şükürbəyli, Rəsullu, Şahsevənli, Korabazlar,
Hacalımuradlı, Əhmədallar, Kürmahmudlu, Xəlfəli, Ovşar -elat tərəkəməli gələrdilər.
Yollar qoyun sürülərini, mal-qara naxırını, at ilxılarını, dəvə qatarlarını
tutmazdı. Qadınlar dəvələrin üstündə fərməşlərin arasında oturub yun darayar, cəhrə
qurub ip əyirərdilər... Novruz müəllim: Şair, darıxmırsan ki, yolumuz az qalıb,
tezliklə İnşallah mənzil başına çatacağıq. Mən yenə xəyal dünyamdan ayrıldım.
-Novruz
müəllim, bu yerlərdə olmusan? Isti olan yerlərdi.
-Bir-iki
dəfə olmuşam, aran isti olar də. -dedi Novruz müəəllim.
Novruz
müəllim, mən bir neçə il əvvəl Qaradonlu kəndinə getmişdim, daha doğrusu o kənddən
keçib gedirdim. Göydən od yağırdı. Maşının mühərriki qızdırırdı. Yolun kənarında
bir yaşlı qadın oturmuşdu. Maşını əyləndirdim, düşdüm.
-Nənə
harda bulaq var, maşına bir az su töküm?
-Odey
su! -Palçıq kimi axan kanalı göstərdi.
-Ay nənə,
o palçıq kimi suyu maşına tökməkmi olar?
-Hardan
alım Vedinin durnagöz bulaqlarının suyunu, a bala dərdin ürəyimə?
Nənənin
danışdığından hiss etdim ki, o yurd yanğılı, torpaq haraylı, Vətən həsrətlidir.
Həmsöhbət oldum onunla – Nə deyim, ağrın alım! Stalinin ağzına zəhər tökülsün,
elə töküldü də. Bizi buz bulaqlardan, yaşıl yaylaqlardan, Teltel meşəsindən
ayırdı, gətirib ilanmələşən çöllərə tökdü, qırıldıq, qıpıldıq, uşaqlarımız tələf oldu. Nəyin qoyum, nəyin deyim ay oğul!
Adını
öyrəndim bu nurani qadının- Çiçək! Çiçək nənənin gözlərindən oxuduğum misralara
çevrildi.
Vətəndə Vətənsiz olmuşam indi,
Qəmlə köklənmişəm, dolmuşam indi.
Dağlara tamarzı qalmışam indi,
Gəlmişəm od yağan arana, şair.
Çiçək nənə, yadıma bir bayatı düşdü:
Gəl gedək Daşbulağa,
Suyu sərxoş bulağa.
Sən dərdli, mən yaralı,
Tökək qan yaş bulağa.
Mən də o dağların həstəriylə
yaşayıram, Çiçək nənə.
Dağlar məndən üz döndərib, inciyib,
Incisə də, gedəmmirəm, neyləyim.
Dərdə dərman, buz göndərib inciyib,
Incisə də gedəmmirəm, neyləyim.
Əlim çatmır yalmanlayam ağ yolu,
Viran qalıb bağça yolu, bağ yolu!
Qəribsəyən dağ cığırı, dağ yolu,
Incisə də gedəmmirəm, neyləyim.
Bu gərdişdə namərd tutur mərd yeri,
Peyda olur gündə neçə dərd yeri.
Yetim qalan ocaq daşı, yurd yeri,
Incisə də gedəmmirəm, neyləyim.
Mənim sazım qəm üstündə köklənib,
Yaralarım qaysaq tutub köhnəlib.
Ələsgərin arzuları təklənib
Incisə də gedəmmirəm, neyləyim.
Çiçək
nənə bu şeiri dinlədikdən sonra, bir az da kövrəldi, qəhər onu boğdu, gözlərindən
yaş bıldır-bıldır axdı. Mən ona ürək-dirək verdim. Ağlama nənə, özünü toxdaq
saxla. Bizim indi güclü ordumuz, uzaq görən, Silahlı qüvvələrin Ali Baş Komandanı, möhtərəm prezidentimiz cənab İlham
Əliyev kimi ölkə başçımız var. İnşallah biz tezliklə tarixi torpaqlarımıza, dədə-baba
yurdlarımıza qayıdacağıq!
Çiçək nənə yaylığının ucu
ilə gözünün yaşını sildi – Nə deyirəm ay oğul, Allah ağzından eşitsin. Amma ürəyimdə
pas atmış bir arzum var. Istərdim ki, elə indi kəndimizə gedəm, yaylığımın,
koftamın, dizdiyimin parçaları cırılıb qalmış, dağları, tikanlı çölləri bir də
doyunca seyr edəm. Ondan sonra arxayın ölərəm. Mənim üçün ən böyük dərd torpaq
itirmək, doğulduğun yurda həsrət qalmaqdır, ay oğul!
-Darıxma
nənə, hər gecənin gündüzü, hər yoxuşun
düzü var. Biz yaşımızda çox hadisələrin şahidi olmuşuq. Mən dağları hər üzünə
görmüşəm.
Vaxt olub ki, el yaylağa sazlanıb,
Vaxt olub ki, gözəlləri nazlanıb.
Vaxt olub ki, çiçəkləri tozlanıb,
Vaxt olub süzülüb balı
dağların...
Vaxt olar ki, bağlı yolu açılar,
Qırışığı, əli-qolu açılar.
Əvəzin də şirin dili açılar,
Gedər görüşünə ulu dağların.
Doğrudan
da söhbət yolu yorarmış. Bu uzaq yolu necə gəldik bilmədim deyə Novruz müəllim
üzünü mənə tərəf çevirdi.
-Bu da
Ucar! Çatdıq! Həqiqətən Ucar gündən günə ucalır. Burada gedən abadlıq,
quruculuq işlərini görəndə adamın ürəyinə təpər dolur, qollarına qüvvət, dizlərinə
taqət, gözlərinə nur gəlir. Bütün bölgələrdə olduğu kimi Ucarda da dövlət
qayğısı açıq-aydın hiss olunur. Parklar, xiyabanlar, məktəblər, xəstəxanalar,
idman kompleksləri, asfalt döşənmiş yollar, nur selinə qərq olmuş küçələr,
yaraşıqlı yaşayış evləri göz oxşayır, insanın ruhunu təzələyir. Ən ucqar kəndlərimiz,
qəsəbələrimiz şəhərdən seçilmir. Insan yaşayışı üçün hər bir şərait var.
Hacının doğulub boya-başa çatdığı Çiyni kəndinə döndük. Küçə boyu dalğalanan
bayraqlar, havada uçan şarlar diqqətimdən yayınmadı.
Burada
böyük izdiham, insan seli gördük. Hacının öz vəsahiti hesabına tikdirdiyi iki mərtəbəli
məktəbin həyətində bir canlanma hökm sürürdü. Hamının üzündən, gözündən sevinc
yağırdı. Müəllimlər, şagirdlər, kənd sakinləri, ağsaqqalla,r gələn qonaqları,
millət vəkillərini, iş adamlarını, ziyalıları, aktyorları, mədəniyyət işçilərini
qonaqpərvərliklə qarşıladılar. Hamımız ulu öndər Heydər Əliyevin möhtəşəm abidəsi
önünə gəldik. Tər çiçək dəstələri qoyduq, hörmət və ehtiramımızı bildirdik.
Toplantıda iştirak edənləri Ucar rayon icra hakimiyyətinin başçısı salamaladı və
sözü millət vəkili, YAP-nın şura üzvü Mübariz Qurbanlıya verdi.
Mübariz
Qurbanlı Heydər Əliyevin Azərbaycana etdiyi xidmətlərdən, xalqı qarşıdurmadan,
qardaş qırğınından, vətəndaş müharibəsindən xilas etməsindən, iqtisadiyyatı
dirçəltməsindən, müstəqil Azərbaycanın memarı və qurucusu olmasından geniş
danışdı. Bu gün Azərbaycan dövlətinin etibarlı əllərdə olmasından Heydər
Əliyevin siyasi kursunun layiqli davamçısı, möhtərəm prezidentimiz cənab İlham
Əliyevin siyasi fəaliyyətindən, ölkəyə səriştəli rəhbərlik etməsindən, Azərbaycanı
lider dövlət kimi dünyaya tanıtmasından, torpaqlarımızın işğaldan azad olması
üçün atdığı qətiyyətli addımlarından söz açdı, məzmunlu çıxışını iştirakçılara
çatdırdı. Hacı Ağamirzə Əhədovun bu
xeyirxah işini ulu öndərə hörmət və ehtiram kimi qiymətləndirdi. Digər natiqlər
də Ağamirzə Əhədovun bayraq meydanı, məscid, məktəb tikdirməsindən, xeyriyyəçiliyindən,
səmimi və mehriban insan olmasından ürək dolusu danışdılar. Mən müəllim
olduğum üçün Hacı Ağamirzənin tikdirdiyi Çiyni kənd orta məktəbinə getdim, məktəbin
direktoru Eynulla müəllimlə tanış oldum. Sinif otaqlarını gəzdim,
laboratoriyalara baxdım ürəyim dağa döndü. Azərbaycanlı balalar belə gözəl və
yaraşıqlı məktəblərdə təhsil alırlar. Bunlar hamısı müstəqil Azərbaycanın
dinamik inkişafından xəbər verir. Apardığım kitabları məktəbin kitabxanasına
armağan etdim. Hacı Ağamirzə Əhədov qonaqlara zəngin nahar süfrəsi açdı. Elə həmin
gün yüksən əhval ruhiyyə ilə doğma Sumqayıta qayıtdıq.
Sumqayıtım
gözəl diyar,
Torpağına
qurban olum.
Budaqlardan
qopub düşən,
Yarpağına
qurban olum.
Varlığına
keşik çəkən,
Mərd
oğluna, mərd qızına qurban olum.
Gözəllikdə
tayın yoxdu,
Gəl
özünə qurban olum.
Əvəz Mahmud Lələdağ
Комментарии
Отправить комментарий