Sumqayıt möcüzəsi

Sumqayıt möcüzəsi

Mənim doğma şəhərim,

Eşqim, gücüm, hünərim.

Sən mənim ümid yerim,

Inam yerim, and yerim,

Sən necə də gözəlsən,

Gündüzün özgə aləm,

Bax, gecə də gözəlsən.

Iman yerim Sumqayıt,

Güman yerim Sumqayıt

Ilham yerim Sumqayıt

Mənim doğma şəhərim

Səni hər an, hər zaman

Bax beləcə şən görüm,

Qoynunu gülşən görüm!

***

Möcüzələr yaratdı,

Qoynunda insan əli.

Günəş əlini sıxdı,

Oldun dünya gözəli.

Toz-torpağın çırpıldı,

Tər-təmiz təmizləndin

Sevənlərin gözündə

Sevildin, əzizləndin.

Pak oldun, gözəl oldun

Şairlərin qəlbində

Söz oldun, qəzəl oldun!

Mənim doğma şəhərim,

Səni hər an, hər zaman

Bax beləcə şən görüm,

Qoynunu gülşən görüm.

***

Keçilməz hasar oldun,

Paxıl bədnəzərlərə,

Bədxah nəfəslər  dəyməz

Bu müqəddəs yerlərə.

Şoranlığın əridi,

Güllü gülüstan oldun,

Ağızlarda dolaşdın,

Dillərdə dastan oldun

Insan oğlu his-pası,

Təmiz süpürüb atdı,

Tarixdə görünməmiş

Möcüzələr yaratdı

Mənim doğma şəhərim

Səni hər an, hər zaman

Bax beləcə şən görüm,

Qoynunu gülşən görüm!

***

Belə möcüzə görüb

Güldü nazlı səhər də

Səni bağrına basan

Qəlbi geniş Xəzər də

Nur içində yox oldu,

Qaranlıq gecələr də

Hamı firavan gəzdi

Işıqlı küçələrdə,

Suya çəkib qurutdu,

Köynəyini ağaclar,

Dərdi, qəmi unutdu

Burda oldu hər nə var

Əkildi xan çınarlar

Eldar şamları çil-çil

Ilanın boğazından

Indi çıxıb elə bil

Mənim doğma şəhərim,

Səni hər an, hər zaman

Bax beləcə şən görüm,

Qoynunu gülşən görüm.

***

Şirin laylanı çaldı,

Mavigözlü Xəzərim

Mənim doğma şəhərim,

Daim gözəlləşdirir,

Rəhbər öz yurdunu

Gül-çiçəyə bələyir

Eyləyir saz yurdunu

Üstünə ləl-gövhəri

Duman çilər, çən çilər,

Otların qulağında

Üzə çıxar incilər

Yurdum, yuvam Sumqayıt

Elim, obam Sumqayıt

Mənim doğma şəhərim,

Səni hər an, hər zaman

Bax beləcə şən görüm,

Qoynunu gülşən görüm.

***

Dənizin sahilində

Yarandı təzə bulvar

Elə bil yer yarıldı,

Tez çıxdı üzə bulvar

Tayı yoxdu dünyada

Yaraşır bizə bulvar

Cazibədar olubdu

Dəniz kənarı bulvar

Üstünə inci səpir

Göydən bəyaz buludlar

Sevilənlər, sevənlər

Gedib bir də gəlirlər,

Burdakı fəvvarələr

Güllərə su çilərlər

Cavanların üstünə 

Ən xoş arzu çilərlər

Mənim doğma şəhərim,

Səni hər an, hər zaman

Bax beləcə şən görüm,

Qoynunu gülşən görüm.

***

Burda əsər, səngiməz,

Hər vaxt bahar yelləri,

Əsdirər tər gülləri

Şad edər könülləri

Burda ağbədən qızlar

Nazlı gözəllər gəzir

Güllərin ağuşunda

Şeyda bülbüllər gəzir

Can verib, can alanlar

Sevən könüllər gəzir

Yanağından qan daman

Qarışqa bellər gəzir

Ətir  saçan bağlarda

Gecə mələklər gəzir

Sənə xoş gün diləyən

Arzu, diləklər gəzir.

Mənim doğma şəhərim,

Səni hər an, hər zaman

Bax beləcə şən görüm,

Qoynunu gülşən görüm.

***

Mən sənin hər güşəni,

Küçə-küçə gəzirəm

Yorulmaq bilməyirəm

Gündüz, gecə gəzirəm

Allı-güllü parkları

Sübhdən öncə gəzirəm

Gülşənində tər çiçək

Təzə qönçə gəzirəm

Başımda eşq atəşi,

Beli incə gəzirəm

Əfsanəvi cənnətdə

Bilməm necə gəzirəm

Mənim doğma şəhərim

Səni hər an, hər zaman

Bax beləcə şən görüm,

Qoynunu gülşən görüm.

***

Cənnətə inansaydım

Deyərdim cənnət budu

Elinə, obasına,

Mərhəmət, hörmət budu

Arzuları gül açan

Şərəfli zəhmət budu

Arxa-arxaya verib

Çalışan millət budu

Dövlətinə, xalqına,

Inam, sədaqət budu

Cavanları coşdular

Ar, namus, qeyrət budu

Böyüyən  körpələ

Qayğı, səxavət budu

Üç rəngli bayrağım var

Şan budu, şöhrət budu,

Müstəqillik, azadlıq,

Tükənməz sərvət budu

Allahın bəndəsinə

Verdiyi nemət budu

Müzəffər ordusu ilə

Öyünən dövlət budu.

Mənim doğma şəhərim,

Səni hər an, hər zaman

Bax beləcə şən görüm,

Qoynunu gülşən görüm.

***

Baxdıqca hey  baxıram,

Gözəllikdən göz doymur,

Aşıqlar əldən düşür

Sinədəki saz doymur

Cavahir dodaqlardan

Axıb gələn söz doymur

Vallah bu sehrangahda

Işvə  doyur, naz doymur

Oğlan nazdan yorulur

Bu həvəsdən qız doymur

Bunu yaradan insan

Deyin, unudularmı

Dünyanı gəzib, dolan

Belə gözəllik varmı?

Mənim doğma şəhərim,

Səni hər an, hər zaman

Bax beləcə şən görüm,

Qoynunu gülşən görüm!