Dağlar

Dağlar

Niyə belə qəmlisiniz

Yönü bəri yatan dağlar.

Yazda , yayda hay-haraylı,

Qışda yasa batan dağlar.

Bu nə görkəm, bu nə duruş,

Hanı Nəbi, hanı Nuruş,

Yaylaqları qarış-qarış,

Kimlər oldu satan, dağlar.

Namərd oldu qanlı yağı

Zədələdi bu torpağı!

Sinəmə çəkdilər dağı,

Yandı mənim atam , dağlar.

Yurd yerləri boş qalıbdı,

Ocaq sönüb daş qalıbdı.

Gözlərimdə yaş qalıbdı,

Yoxdur qoldan ,tutan dağlar.

Kimlər aşdı arxaşanı,

Yadlar pozdu haqqı- sanı.

Çal-çağırlı ellər hanı,

Çatmır dada çatan, dağlar.

Neçə qapı bağlı qaldı,

Neçə sinə dağlı qaldı,

Yağlıgüney yağlı qaldı,

Kimdi bizi atan,dağlar.

Ömrümün qürub çağında,

Bir qızınam ocağında .

O mehriban qucağında

Bir doyunca yatan, dağlar.

İgidlərin nərəsində,

Çəkiləcək bu duman çən.

Sevinəcək ana Vətən,

Dərdi, qəmi atan dağlar.