Bilmirəm
Bilmirəm
İsti yuvam soyuq olub,
Qala bilmirəm, bilmirəm.
Yağılardan qisasımı,
Ala bilmirəm, bilmirəm.
Qoyub gəldim Sarıyalı,
Dərd yaramı sarıyanı,
Yadı mənə sırıyanı,
Hələ bilmirəm, bilmirəm.
Baxammıram o yollara,
Çıxammıram o yollara.
Şirin-şirin xəyallara,
Dala bilmirəm, bilmirəm.
Sərin gördüm mən bu yazı,
Bəd yazıldı, bəd bu yazı.
Sinəmdəki qəmli sazı.
Çala bilmirəm, bilmirəm.
Başı qarlı dağım qaldı,
Nehrə-nehrə yağım qaldı,
Necə gözəl çağım qaldı,
Gülə bilmirəm, bilmirəm.
Ay Arxalı, ay Lələdağ,
Ayrı düşdük, gərdişə bax.
Əl eyləmə, Sərinbulaq,
Gələ bilmirəm, bilmirəm.
Комментарии
Отправить комментарий