Tədbir sənindi

Tədbir sənindi

Daş kimi yatardım daşların üstə,

İndi qu tükündə yata bilmirəm.

Yuxum atlı olub mənsə piyada,

Ayaq götürürəm çata bilmirəm.

Zülmət gecələrdə çöldə, çəməndə,

Torpağa yapışıb qalmışam,  inan.

Yatmışam yağışda, dumanda çəndə,

Qumaşa dönübdü altımda tikan.

Bir çimir gəlməyir gözümə indi

Ah-vayla köklənib gündüzüm,gecəm.

Cəsarət tapmıram özümdə indi

Heçlərin içində ta mən də heçəm.

Nazlı gözəllərdən  kənar gəzirəm,

Sevilə bilmirəm səbəbi aydın

Bəzən öz canımdan özüm bezirəm.

Deyirəm, əzəldən kaş olmayaydım.

Yadıma düşməyir nə dağ, nə aran,

Köhləni minməyə təpərim yoxdur.

Gecə intizaram,gündüz nigaran

Elimdən,obamdan xəbərim yoxdur.

Bir zaman eşq əhli olmuşam mən də,

Eşqin atəşində çırpıyam indi

Qız-gəlin görəndə dururam gendə,

Mən kiməm Ya Rəbbim, tədbir sənindir