Sizi gözləyirəm

    Sizi gözləyirəm

Yüz dəfə qasırğa çıxdı qarşıma,

Yüz ildə millətim yüz yol sınandı.

Göydən tökülsə də alov başıma,

Ürəyim vətəndən çətin sınandı.

Faciyə -faciyə dalınca gəlir,

Bayquşun sevinci dünyaya sığmır.

Quşların naləsi göyə yüksəlir,

Yağının başına ildırım çaxmır.

Sevdaya qarışdı bir vaxt başımız ,

Bezmişəm inləyən qaboy səsindən.

Zəhərə , zəqquma döndü aşımız,

Yadların əliylə talandı Vətən.

Gavur hər daşımı qənimət sanır

Yadımdan çıxmayır, o yerlər bir an

Hər söhbət düşəndə ürəyim yanır.

Bu dərd varlığımdan çıxmaz heç zaman

Həyatda görmüşəm dəhşətli anlar,

Amansız yağını, yadı yandırın.

Sizi gözləyirik igid cavanlar,

Qələbə tonqalı alovlandırın!