El yada düşdü
El yada düşdü
Gəl sarıl boynuma, a telli sazım,
Çıxaq yaylaqlara, el yada düşdü
Gəzək oymaq-oymaq dağı, dərəni,
Çəmən yada düşdü, çöl yada düşdü.
Nəğməkar quşların şirin nəğməsi,
Havalı tərlanın göydən enməsi,
Ayna bulaqların xoş zümzüməsi,
Bulanıb durulan sel yada düşdü.
Enək Çuxurbağa, gedək Ağdüzə,
Özəkli baldırğan çıxıbdır dizə.
O yemlikli dərə, yarpızlı közə,
Bülbülün həmdəmi gül yada düşdü.
Bu uğurlu yolda, gözəl səfərdə,
Ellərin qəlbində gəz pərdə-pərdə.
Əvəz qəm eləməz sən olan yerdə,
Könül çalxalandı,göl yada düşdü.
Комментарии
Отправить комментарий