Var

                    Var

Bütün dağlar düzülsə gözlərimin önünə,

O dağa qurban ollam, zirvəsində qarı var.

Görünməsin gözümə çəmənlərdə bir tikan,

O çəmənə qurbanam, çiçəkli baharı var.

Yer üzünü bəzəyir, zinətidir insanlar,

O insana qurbanam, əyilməz vüqarı var.

Dostluq böyük nemətdir, qədirbilən yanında,

O dosta qurbanam ki, əhdi var, ilqarı var.

Əzəldən sevməmişəm nərmə-nazik əlləri,

Qurbanam o əllərə, zəhmətdən qabarı var.

Hər elin öz yeri var,əl boyda ürəyimdə,

O elə qurbanam ki, kamanı var, tarı var.

Şair xalqın ümidi, işıqlı gələcəyi,

O şairə qurbanam sözünün tutarı var.

Telləri min havalı, telli saza aşiqəm,

Elimin neçə-neçə gözəl nəğməkarı var.

Eldən-elə dolaşır yurdumuzun sorağı,

Vətənimə qurbanam, tükənməyən varı var.

Arazın o tayında qalıbdır yarı canım,

Qəlbimin döyüntülü neçə intizarı var.

Bir təsəlli dolanır, Əvəz könlüm evində,

Nə yaxşı ki, o tayın ustad Şəhriyarı var.