Təzədən
Təzədən
Əbəs yerə yenə çıxdın qarşıma,
İstəyimi kor eləmə təzədən.
Özün salıb sındırmısan könlümü,
Ağ saçıma qar ələmə təzədən.
Baxışların çəpələdi yolumu,
Dönüklüyün buxovladı qolumu.
Yaman gündə soruşmadın halımı,
Ürəyimi yaralama təzədən.
Sərtliyinə tab etmədi ürəyim,
Nahaq yerə paralandı çörəyim.
El-obama söykənibdir kürəyim.
Məni eldən aralama təzədən
Cavanlığım ələk-ələk ələnib,
Könül bağım uralanıb, ələnib,
Hisslərimə payız çəni bələnib,
Əvəz, məni qaralama təzədən.
Комментарии
Отправить комментарий