Bənövşə

Səninlə həmişə həmdəm olmuşam,

Məst edən ətirin hanı, bənövşə?

Bəlkə üzün dönüb, məndən küsmüsən,

Köhnə sirdaşını tanı, bənövşə.

Bu qoca dağların həyalı qızı,

Gəl yenə birlikdə keçirək yazı.

Sənsiz kökdən düşər könlümün sazı,

Səndədir eşqimin canı, bənövşə.

Vətən intizardı, mən də nigaran,

Nə loğman tapılır, nə dərdə dərman.

Ürkək baxışına olsam da heyran,

Xəstədir yurdumun yanı, bənövşə.

Qalıb yad əllərdə Dədə Ələsgər,

Boylanır yollara hər axşam-səhər.

İstəməzdim sənə deyim bəd xəbər,

Töküldü ərlərin qanı, bənövşə.

Boynunu bükübdü sən tək Əvəz də,

Marallar gədikdə, ceyranlar düzdə.

Bir gün daşdanarıq Vətənə biz də,

Yetişər həsrətin sonu, bənövşə.

15.04.2007

Evez Mahmud Leledag