Yaşa, qardaş

Yaşa, qardaş

                    Aşıq Abbas Zərgərə.

Tərifləmə çox da məni,

Yaşım keçib qışa, qardaş.

Gözəllərin məclisində,

Çəkilmirəm başa, qardaş.

Könül bağım saralıbdı,

Eşq ocağım qaralıbdı.

Saçlarımı qar alıbdı,

Qızlar baxır başa, qardaş.

O göy meşə, yaşıl tala,

Bir də bizə qismət ola.

Sarı bülbül layla çala,

Mən də gedəm huşa, qardaş

Mən vurğunam saza, sözə,

Bıçaq batsın yaman gözə.

Az etmədi yadlar bizə,

Oxum dəydi daşa, qardaş.

Hanı təbib, hanı loğman,

Gəlib dərdə edə dərman.

Mən olmuşam qəddi kaman,

Necə gəlib xoşa, qardaş.

Az qalıb ki, üç il ola,

Biz həmdəmik qalmaqala.

Sədəfli saz haray sala,

Mənim təbim coşa, qardaş.

De mən hara, bu yer hara,

Tapılmadı dərdə çara,

Mən yarandım bəxti qara,

Sən ağ günlə yaşa, qardaş.

Gör bir nəyi dərd edirik,

Namərdləri mərd edirik.

Xeyli vaxdır yol gedirik,

Nadanlara qoşa, qardaş.

Çoxlarına bəxt düşübdü,

Bəxt olana taxt düşübdü.

Bu gərdişdə çox düşübdü,

Əvəz bərkə-boşa, qardaş.