Yadında varmı

Yadında varmı

Çoxdandır getmirəm o dağlara mən,

Ovçunun bərəsi yadında varmı?

Ayağı xınalı, dili nəğməli,

Kəkliyin fərəsi yadında varmı?

Nə qədər şirindir uşaqlıq çağı,

Dolanıb gəzərdik dərəni, dağı.

Eymənin qatığı, nehrənin yağı,

Qoyunun kərəsi yadında varmı.

Yadımdan çıxmayır dağların adı,

Qalıb damağımda yarpızın dadı,

Sinəmdə közərir bir həsrət odu,

Ağdüzün təpəsi yadında varmı.