Əsrin fenomeni

                                         Əsrin fenomeni

Məmləkətimiz fəlakət burulğanında boğulduğu bir zamanda bacarıqlı sərkərdə müdrik rəhbər, dünya görmüş ağsaqqal H. Əliyev xalqın təkidi ilə yenidən hakimiyyətə gəldi. Onun gəlişi ilə respublikada həm daxili, həm də xarici siyasətdə bir saflaşma, paklaşma, təmizlənmə duyuldu, siyasi iqlim əsaslı dəyişdi, qanun mexanizmi işlədi. Daxildəki didişmələrə, hakimiyyət davasına, özbaşınalığa, qanunsuz silah saxlamalara, uşaq oğurluğuna son qoyuldu, respublikada siyasi sabitlik yarandı. Əhali vahimədən, hədədən-qorxudan  xilas oldu, rahat nəfəs aldı. Nəhayət, insanların  huququnu müdafiə edən tapıldı, ölkənin əhalisi özünə gəldi. Saz tutub söz qoşdu:

                                              Qoca Şərqin Günəşisən, Ayısan,

Bu millətin tale verən payısan,

Sərkərdəsən, dahilərin tayısan.

Xudam səni hifz eləsin xəbisdən

Sən gələli səngiyibdi duman, çən.

Bu yaş nədir ömür çatdır yüzə sən.

Bu hörmətə, bu qeyrətə yüz əhsən,

Dar ayaqda yaman çatdın bizə sən,

Qarşıdurma götürüldü aradan,

Səni bizə çox görməsin yaradan.

Sənsiz bağa çəyirtgələr darışdı,

Halal, haram, günah, savab qarışdı,

Ömür yolun dərə keçdi, dağ aşdı,

Sərt yoxuşda qatlanmadı dizlərin,

Daim güldü uzaqgörən gözlərin.

                                             Ulu tanrı hər an sizə yar olsun,

Dostun gülsün, düşmənlərin xar

                                        olsun.

Vaqqıldayan bayquşlara ar olsun,

Varı, yoxu əlimizdən aldılar,

El obanı yaman günə saldılar.

Heydər baba, köhlənini sür öndə,

Qayğılıdır indi dövran sürən də.

Nənəm sizi ekranlarda görəndə,

Yazıq qarı üzərrik, duz yandırır,

Neçə-neçə bədnəzər göz yandırır.

Yurdumuzun nicat yolu səndədir,

Görən gözü, vuran qolu səndədir.

Ərşi, gürşü, sağı, solu səndədir.

Yağılara vahiməsən, hədəsən,

Ata sənsən, baba sənsən, dədə sən.

Heydər baba dünya alış-verişdi,

Təhlükəni sovuşdurmaq zor işdi,

Məqam çatdı xeyirlə şər görüşdü

Neyləməli zaman cəllad olubdu,

Yağı düşmən qəsdimizə dolubdu.

Heydər baba, Əvəz gəldi özünə,

Haqq oyandı, bəxti güldü üzünə

O, inanır ağsaqqalın sözünə.

Allah, qaytar itib batan inamı,

Naxələflər ucuz satan inamı.

Ayrı-ayrı bölgələrdə başlanan xoşagəlməz hadisələr, dəstəbazların amansızlığı, dövlətçiliyimizə, müstəqilliyimizə qarşı yönəldilən xəyanət, respublikanı parçalamaq, prezidentin həyatına qəsd cəhdləri baş tutmadı, ölkə dəhşətli təhlükədən sovuşdu. Xalq öz xilaskarına inandı, onun çağırışına gəldi, torpağa, millətə xəyanət edənlər elin qəzəbinə, nifrətinə düçar oldular, ifşa edildilər. Xalq çörək itirənlərə, böyüklüyə asi çıxanlara nifrət duası oxudu.

Kimə tuşlamısan sən bu silahı,

Qardaş da qardaşa güllə atarmı?

Yerdə Ağsaqqalı, göydə Allahı,

Müqəddəs saymayan əhdə çatarmı?

Xalq üzünü haqqa tutdu, şükür elədi, vətənə göz aydınlığı verdi.

Ana Vətən nə yaxşı ki,

İgid, cəsur övladın var.

Uzaq görən, yol göstərən,

Sərkərdən var, ustadın var.

Gərək onu hamı duya,

O, dayaqdır, el-obaya

Odur bizə hörmət tacı,

Odur bizə qeyrət tacı.

O yaşadır ana yurdu.

Yağıların qarşısında

Əyilmədi, məğrur durdu.

Dağılmış dünyamızı

Özü tikdi, özü qurdu

Yurdumuzun igid oğlu,

İnamlıdır qələbəyə,

Çətinliyə sinə gərir-

Azərbaycan gülsün deyə.

Alqış, əhsən bu qeyrətə,

Bu inama, bu ülfətə

Torpaqların xilasına

Haraylayır bizi, qardaş!

Yolumuza nur çiləyir,

Onun nurlu gözü, qardaş

Namərd addım ata bilməz,

Nadan eli sata bilməz,

Kimsə ara qata bilməz,

Sərkərdəmiz olan yerdə.

Haqqın səsi bata bilməz,

Sərkərdəmiz olan yerdə.

            Möhtərəm prezidentimizin xarici siyasət sahəsində böyük uğurları var. Onun Amerikaya, Çinə, Fransaya, Rusiyaya, Yaponyaya, İngiltərəyə, Danimarkaya, Pakistana, Ukraynaya, Qazaxıstana, Özbəkistana, Türkiyəyə, İspanyaya və başqa ölkələrə etdiyi səfərlər zamanı həmin ölkələrin dövlət başçıları onun geniş dünya görüşünə, dərin biliyinə, möhkəm yaddaşına heyran olurlar. Özbəkistanın prezidenti İ. Kərimovun «Prezidenti Heydər Əliyev olan xalq xoşbəxt xalqdır». deməsi buna canlı sübutdur.

            ABŞ prezidenti B. Klintonun H. Əliyev barədə söylədiyi fikrilər çoxlarını təsirləndirmişdir.

            «H. Əliyev çox böyük dahi siyasətçidir. Azərbaycana belə adamlar çox lazımdır. Onda Azərbaycan dah sürətlə inkişaf edər və daha güclü olar. H. Əliyevin gördüyü işlər Azərbaycanın çiçəklənməsinə, inkişaf etmiş bir dövlətə çevrilməsinə çox böyük fayda verəcək».

Möhtərəm Prezidentimiz  H. Əliyev haqqında düşünərkən fikrimin fonunda çox əzəmətli və məğrur bir sima, incə, həssas, həm də son dərəcə qüdrətli bir istedad canlanır. H. Əliyev bu zirvəyə çatana qədər mürəkkəb həyat yolu keçmiş, ağır və böhranlı bir təkamül dövrü yaşamışdır.

Mən H. Əliyevə başqa bir prizmadan baxmaq istəyirəm. Bu gün respublikadakı siyasi sabitliyi görməyən, iqtisadiyyatdakı dirçəlişi hiss etməyən, əldə edilmiş atəşkəsi alqışlamayan, iqtisadi islahatları qəbul etməyən, dövlətçiliyimizin möhkəmlənməsini duymayan, əsas qanunumuzu, ilk demokratik konstitusiyamızı, parlamentimizi təsdiqləməyən, hər yeni uğura, şad xəbərə ağız büzən adamın ürəyi sönük, gözü kor, qulağı kar, mənəviyyatı dayazdır.

Prezidentimizdə güclü müşahidə qabiliyyəti var. Bəzən başqaları üçün xırda, əhəmiyyətsiz sayılan məqamlar onun gözündən yayınmır.

İntuisiya və fəhm. Bu da müdriklərə xas olan ən gözəl xüsusiyyətdir. Daxili inam və fəhm ən böyük siyasətçiləri heyran qoyan addımı atmaqda ona kömək edir. Onun gözəl təhlil etmək qabiliyyəti var. Bu yaxınlarda xalq şairi B. Vahabzadənin «Hara gedir bu dünya?» əsərinin ilk tamaşasına baxdıqdan sonra əsəri bir ədəbiyyatşünas, teatrşünas kimi təhlil etməsi şəxsən məni heyran etdi. Siyasi tərəfdən çıxardığı nəticələr baş verəcək bəlaların qarşısını almaqda, hadisəni düzgün istiqamətləndirməkdə imkan verir.

Adaptasiya. Hansı mühitə düşürsə ətrafdakılarla xoş münasibət yaratmağı bacarır. Böyüklə böyük, kiçiklə kiçik rəftar edir.

Diplomatiya. Bircə onu demək kifayətdir ki, dünya diplomatları XX əsrin ən böyük şəxsiyyətləri, siyasi xadimləri Heydər Əliyev diplomatiyasına heyran olurlar. Bax, elə Türkiyə respublikasının bütün dünyada məşhur olan «Nərgiz TV» kanalının keçirdiyi rəy sorğusu nəticəsində toplanan 59413 səslə ilin ən görkəmli siyasətçisi, diplomatı adına bizim möhtərəm prezidentimiz Heydər Əliyev cənabları layiq görüldü.

Daxili mədəniyyət. Yüksək mədəniyyəti, əsl azərbaycanlı kişisinə xas olan ağayanalığı, beynəlxalq etnik qaydaların incəliklərini bilməsi onu başqalarından fərqləndirir.

Özünənəzarət. Ən çətin anlarda özünü itirmir, hiss və həyəcanlarını daxildə boğmağı bacarır, arzusuna, məqsədinə nail olmaq üçün dünyanın bütün sirlərinə vaqif olan dörd şeyə arxalanır. Hikmət, ağıl, təmkin və ədalət.

Son illərdə amnistiya haqqındakı verdiyi yadda qalan ədalətli fərmanlar humanist bir insanın dərin zəkasının bəhrəsidir. Güclü yaddaşı var. O, 30-35 il əvvəl baş verən hadisələri, əmək adamlarına, elm xadimlərinə, mədəniyyət işçilərinə, yazıçılara, şairlərə göstərdiyi qayğıları bu gün də çox dəqiq bilir, ayı, günü belə yadından çıxarmır. Hətta toplantılarda məruzə edən şəxslər rəqəmləri yanlış deyəndə onun səhvlərini dərhal düzəldir. Biz bu gözəl keyfiyyətin hər gün şahidi və iştirakçısı oluruq. Baxışları və nitqi maqnetizmi ilə insanları özünə cəlb edə bilir. Onun gözlərinə baxan yalan danışa bilməz. Qədim tarixə malik olan gözəl adət-ənənələrimizi dərindən bilməsi də təqdirəlayiqdir.

Heydər Əliyevin bir Vətəni var-Azərbaycan! Onun dediklərini poeziya sığalına gətirsəm.

   -Hara getsəm, harda olsam,

Əl çatmayan, ün yetməyən

Bir qalada darda olsam

Sənsən canım mənim, Azərbaycan!

           -deyir.

Müdrik el ağsaqqalıdır. O, Vətənini, torpağını sağlam ehtirasla sevdiyi kimi millətini də, dilini də, dinini də ürəkdən sevir. «Ölsəm xalqımla birlikdə öləcəm, Yaşasam xalqımla birlikdə  yaşayacam» deyir.

Qaçıb yad ölkələrdə baş girələyənlərə nifrət edir. O, müdrik bir ağsaqqal təmkini ilə insanları birliyə, mehribançılığa sövq edir.

Heydər Əliyev bəşəriyyətə nicat yolu göstərməyə qadir  olan sərkərdədir. O, qəlbində yaşatdığı arzularla, gözəl, xoşbəxt gələcəyə inamla nəfəs alır.

Böyük zəka, düha, kamal sahibi olan Heydər Əliyev mövcud aləmdəki ziddiyyətləri, haqsızlığı və zülmü aradan qaldırmağa can atır, nahaq qanların tökülməsini, yurd-yuva dağılmasını istəmir.

XX əsrin yeganə şəxsiyyətidir. Ona görə də o, nəinki ilin adamı, hətta əsrin adamı adına layiqdir. Əsrin fenomenidir. Əminəm ki, əgər belə bir rəy sorğusu bütün dünyada keçirilsə, bizim hörmətli prezidentimiz yenə ən yüksək ada layiq görüləcək.

            Artıq respublikamızda hər bir şey öz məcrasına düşüb. İndi yaratmaq, qurmaq lazımdır. Adam fikirləşəndə ki, birdən hakimiyyətə H. Əliyev gəlməsəydi, nə olardı? Dəhşətə gəlirsən.

Daş-daş üstə qalmaz idi,

Heydər baba gəlməsəydi.

Ölkə azad olmaz idi,

Heydər baba gəlməsəydi.

İş qalmışdı gör nə yerə,

«Nər» olmuşdu bir heyvərə.

Bölünürdük neçə yerə

Heydər baba gəlməsəydi.

Bakı burda boğulurdu,

Gəncə orda dağılırdı.

Millət cana yığılırdı,

Heydər baba gəlməsəydi.

Azərbaycan, ana yurdum,

Yurd-yuvamı səndə qurdum.

Yaranmazdı Milli Ordum,

Heydər baba gəlməsəydi.

Bağa «cırlar» gətirirdik,

Hayla-küylə bitiridik.

Qibləmizi itirirdik,

Heydər baba gəlməsəydi.

Azərbaycanın hər binasında əlinin hərarəti, hər ağacın böyüməsində əməyi olan, hər mütəxəsisin ərsəyə çatmasında böyük zəhmət çəkən millətin gələcəyini irəlicədən düşünən, C. Naxçıvanski adına hərbi məktəbin açılmasında can qoyan, hər il 800-dən çox gənci Rusiyanın ayrı-ayrı ali məktəblərinə göndərən, xalq üçün ağılasığmaz dərəcədə işlər görən bir şəxsi nüfuzdan salmağa can atanlar qədir-qiymət bilməyənlərdir. Xalqın yarasına məlhəm qoyan, millətin yanında alnı açıq, üzü ağ başı uca olan, el arasında, bütün dünyada sayılıb-seçilən siyasət peyğəmbərinin, müdrik el ağsaqqalının üzünə ağ olmaq bağışlanılmayan günah, keçilməyən təqsirdir.

Torpaqları satan ordunu başsız ordunu başsız qoyub qaçan bacarıqsız «sərkərdələr»ə  xalq öz xilaskarını, rəhbərini göstərib dedi:-Buyurun öyrənin!

Ordubada,

Yol gedir Ordubada.

Sərkərdə dahi olsa,

Verərmi ordu bada?

İnanıram ki, hörmətli ali baş komandan, mahir sərkərdə heç vaxt ordunu bada verməyəcək. Bunu ordumuzun formalaşması da bir daha sübut edir. Tez-tez cəbhə bölgələrində oluram. Respublikanın elə bir qaynar nöqtəsi olmayıb ki, ora getməmiş olum. Cəsarətlə deyə bilirəm ki, əvvəlki ordu quruculuğu ilə bu günkü ordu quruculuğu arasında ağla gəlməz dərəcədə fərq var. Qanun-qayda, nizam-intizam, Vətənə məhəbbət, torpağa sevgi, düşmənə nifrət hissi çox yüksək səviyyədədir.

Ana Vətən, sevin ki, sən

Cəsarətli milli ordun,

Artıq minib səməndinə

Bir gün gələr,

Pir gün gələr.

Düşmən düşər kəməndinə,

Torpağımız azad olar,

Yurd-yuvamız abad olar.

Üz tutarıq o dağlara

Durna gözlü bulaqlara…

Möhtərəm prezidentimiz H. Əliyev ömrünün 75-ci baharını yaşayır. Ürəyimdə bəslədiyim misralar ağ varaqlara düzülür.

                                                                                Karvanını çəkib getdi,

                      yetmiş beş il

Gəncliyinin baxçasından

                     budaq-budaq

Yarpaqları töküb getdi

                   yetmiş beş il

Məhəbbətin sarayını

                   kərpic-kərpic,

Möhrə-möhrə söküb getdi

                    yetmiş beş il

Saçlarına öz əliylə

Qar çiçəyi əkib getdi

                      yetmiş beş il

Bu illərdə nələr çəkib

                       başın sənin.

Nankor əllə düyün düşüb

Arzun sənin, əhdin sənin,

                          işin sənin.

Sərt ayların, nəs illərin

Caynağından saldırmısan

                          gəncliyini.

Güllələrin yağışından

Qorumusan ilk eşqini,

                           dincliyini.

Dərd sajında cız-bız kimi

                      qovrulmusan.

Ələk-ələk ələnmisən,

Üflənmisən, sovrulmusan.

Qılıncını ovxarlayıb,

Hücum edib namərd sənə.

Fəlakətlər pəncəsindən,

Mərd çıxmısan dönə-dönə.

Belə-belə ömür keçib

Yaş üstünə yaş gəlibdir.

Payız çıxıb, qış gəlibdir,

Yaz gəlibdir, yay gəlibdir.

        Sətir-sətir, pillə-pillə

        Həftə gedib, ay gəlibdir,

        Hay- haraylar qucağında

        Misqal-misqal, qəlpə-qəlpə

            əriyibdir yetmiş beş il

Biləyindən yapışıbdır

Öz biliyin, öz istəyin, saf əməlin

Sədaqətli insansan sən,

Zirvəsində qartal gəzən,

Buz suları diş göynədən

Yaylağına karvan-karvan

                         elim köçən

Dərəsində yarpız bitən,

Qayasında min əfsanə,

                      nağıl yatan

Dağlar sənə arxa olub,

                        kömək olub.

Səni dağla qovuşduran,

Zəhmət olub, qeyrət olub,

                          əmək olub.

Sıldırımlı cığırlardan

                          keçə-keçə.

Ağarıbdır başın sənin,

Tanrı sənə dayaq olsun,

Mübarəkdir, yaşın sənin!