Allah, bu millətin neçə dərdi var

Allah, bu millətin neçə dərdi var

On səkkizin dərdi, doxsanın dərdi,

Qırılıb-qıpılan çox sanın dərdi,

Sərkərdə buraxan nöqsanın dərdi,

Allah, bu millətin neçə dərdi var.

Sağalmaz dərd olub, Qarabağ dərdi

Qoyub gəldiyimiz baxça-bağ dərdi

Ulular uyuyan o torpaq dərdi,

Allah, bu millətin neçə dərdi var.

Gəldi Şuşa dərdi, Kəlbəcər dərdi

Yazıq Xocalının körpəcə dərdi

Görən kim arayar, kim seçər dərdi,

Allah, bu millətin neçə dərdi var.

Bir az çadır dərdi, bir az çöl dərdi,

Bir az oba dərdi, bir az el dərdi

Şimaldan boylanan qara yel dərdi

Allah, bu millətin neçə dərdi var.

Didərginlik dərdi, qaçqınlıq dərdi,

Bizi əldən salıb çaşqınlıq dərdi,

Bir azdan gələcək qanlı qış dərdi,

Allah, bu millətin neçə dərdi var.

Dərdi sağaltmağa dərman gərəkdi,

Dərmanı verməyə loğman gərəkdi

Qayğısız olmağa dövran gərəkdi,

Allah, bu millətin neçə dərdi var.

Qanlıdır günahsız qan tökən əllər,

Olub yer-yurdundan didərgin ellər,

Düşmən gülləsiylə «öldü» heykəllər,

Allah, bu millətin neçə dərdi var.

Yediyim, içdiyim zəhərdi, zəhər,

Gərək üzümüzə gülməyə səhər

Cəllad əlindədi Dədə Ələsgər

Allah, bu millətin neçə dərdi var.

Namus, ləyaqətin alçalmaq dərdi,

Namərdin sevinib əl çalmaq dərdi

Dərd çəkən insanın qocalmaq dərdi,

Allah, bu millətin neçə dərdi var.

Vətən görüşünə gəlmək istərəm

Dərdini, sərini bilmək istərəm,

Qalıb qucağında ölmək istərəm,

Allah, bu millətin neçə dərdi var.

Hər kəsin dağ boyda məncə dərdi var,

Gündüz intizarı, gecə dərdi var

Ağbaba, Zəngəzur, Göyçə dərdi var,

Allah, bu millətin neçə dərdi var.

Niyə qılıncını qoyub qınına?

Mənim ulu babam, Koroğlu babam,

Niyə «dəliləri» yığmır yanına

Dağıldı yurd-yuvam, talandı obam.

Gəlsin şir biləkli Dəmirçioğlu,

Zəncir toqqasını belindən açsın

Torpaq satanları, kənd satanları,

Zatı qırıqları dilindən assın.

Səni çağırıram, ay İsabalı,

Torpaq işğaldadı, ana əsirdi

Özünü tez yetir, ay Dəli Həsən

Sındır tilisimi gör bu nə sirdi

Hanı Çənlibelin igid ərləri,

Cənginin ənərəsi qulaq batırmır.

Deyin, Geridönməz qayıtsın geri,

Bu dərdin çarəsi niyə tapılmır?

Səni çağırıram, ay Dəli Mehtər

Ağlını çidarla ağılsızların.

Bu qədər dözmüşük bəsdir ta, yetər

Ağzına yüyən vur o qansızların.

Səni çağırıram, ay Halaypozan

Köhnə dəyirmana təzə dən gəlir.

Səni çağırıram, ay Yuxuyozan,

Gedən qara bulud təzədən gəlir.

Aşıq Cunun hanı, telli saz hanı?

Niyə seçəmmirik baharı, qışı?

Yurdumu bəzəyən faraş yaz hanı?

Kim bizə qarğıyıb belə qarğışı.

Kənarda dayanma Tanrıtanımaz,

Sən də bu obanın, elin oğlusan

Vətən itirənin Vətəni olmaz

Aranın, yaylağın, çölün oğlusan.

Qıratın cilovun tutub Həmzə,

Canla qorunubdu, Canla bu torpaq

«Üç yüz altmış altı» qəsd etdi bizə

Qanla yoğruldu, qanla bu torpaq.

Harda ilişmisən, ay Toxmaqvuran

Gəl yağı başını əz toxmağınla

İgidlər igidi, ay Tüpdağıdan,

Düşməni qovala öz çombağınla.

İtlə dostluq elə deyib atalar,

Çombağı əlindən yerə qoyma sən,

Sənə halal olmaz ananın südü

Yağı kürəyini yerə qoymasan.

O Giziroğlunun odlu şeşpəri,

Düşmən ürəyinə sancılmır niyə?

Könlüm qan ağlayır illərdən bəri

Qarabağ düyünü açılmır niyə?

Döyünən ürəyim, danışan dilim

Eşqimin sultanı Qarabağdadır.

Laləli çəmənim, çiçəyim, gülüm,

Dərdimin dərmanı Qarabağdadır.

Qarabağ günəşim, ulduzum, ayım

İlkin sevgi payım, məhəbbət payım

Qılıncım, qalxanım, kamanım, yayım

İgidlər meydanı Qarabağdadır.

Qarabağ anamdır, bacımdır mənim

Qarabağ şirinim, acımdır mənim

Qarabağ əlçatmaz tacımdır mənim,

Allahın «Quran»ı Qarabağdadır.

Çəkil Qarabağdan sən ey qəsbkar,

Səndə nə namus var, nə qeyrət, nə ar

Mənimdir düzdünya, gördüyün nə var,

Musiqimin xanı Qarabağdadır.

Babamın babası yaşayıb burda,

Fərhad qaya çapıb, daş oyub burda.

Çiynidə el yükü daşıyıb burda,

Yurdun mərd insanı Qarabağdadır.

Mənnən Qarabağı dedim çox umma,

Dayanıb kənardan bir də bax, umma!

Ona yaxın durma, ona toxunma,

Şair Xurşudbanu Qarabağdadır.

Hər kəsin dağ boyda məncə dərdi var,

Gündüz intizarı, gecə dərdi var

Ağbaba, Zəngəzur, Göyçə dərdi var,

Allah, bu millətin neçə dərdi var.

Əvəz Mahmud Lələdağ