A dağlar

                 A dağlar

Gəlmişəm lələni ziyarət edəm,

Nərgizdən bir dəstə üzəm, a dağlar.

Ayna bulaqların suyundan içəm,

Yaşıl yaylaqlarda gəzəm, a dağlar.

Gəlmişəm qaymağa təzə bal qatam,

Çiçək döşəklərin üstündə yatam.

Hər çeşmə başında bir ocaq çatam,

Şişləri yan-yana düzəm a dağlar.

Heyf! Cavanlığı verdim küləyə,

Hanı nənəm toy ununu ələyə.

Qara zurna «Mirzeyi»ni mələyə,

Sındıram a dağlar, süzəm a dağlar.

Canım, Ciyərimdir Vətən torpağı,

Seçilmir aranı, seçilmir dağı,

Çıxam Yargələnə hər axşam çağı,

Əvəzi bu yolda üzəm, a dağlar.