Bilmirəm.

Bilmirəm.

Bilmirəm məni Allah yaradıb,

            yoxsa dəmirçi döyüb.

Allah yaradıbsa, niyə məndən əyib?

Yolumu bağlayıb, bəxtimin

            kələfini düyünə salıb.

Neçə illərdir ki, Vətən mənə tamarzı qalıb.

Tapılmır dərdimin dərmanı,

Töküldü igidlərin günahsız qanı.

Hopdu, Soltan bəyin bizə,

Əmanət qoyduğu müqəddəs torpağa

Bir afat küləyi əsdi, cənnət Qarabağa

Xocalının başına göydən od-alov töküldü

Dağların vüqarı əyildi, beli büküldü.

Məni dəmirçi döyübsə, hanı mərdliyim,

Hanı sərtliyim.

Məni yaradan Allah, mən də onun bəndəsi

Niyə Tanrıya çatmır ana fəryadı,

                        vay-şivən səsi.

Canımı alıb qorxu, gözümdən perik düşüb

Ərşə çəkilib yuxu

O şirin yuxuya yadırqamışam

Cələdə çırpınan fağır bir quşam

Qorxumu canımdan qoparıb atmalıyam

Silaha sarılıb Vətənin dadına çatmalıyam.

“Vartanları”, ayağımdan dartanları,

Yer üzündən silməliyəm.

Öləndə də, kişi kimi ölməliyəm!

Bilmirəm məni Allah yaradıb, yoxsa...