Satırmış demə

Satırmış demə

Çox yaşın bir dostum yad oldu mənə,

Zatı qırıq imiş,qatırmış, demə.

Boğazdan yuxarı  dostluq edirmiş,

İçində nadanlıq bitirmiş,demə.

Əyilib keçirdi,asılı idi,

Boynu qoltuğuma qısılı idi.

Qardaş-bacısıyla «küsülü»idi,

Qurd kimi göz-gözə yatırmış,demə.

Xeyir-şər olubdu,mərd-namərd olub,

Şad xəbər namərdə böyük dərd olub.

Bayquşun niyyəti uçuq yurd olub,

Dostum bayquşdan da betərmiş, demə.

Pir deyib gələrdi pir-ocağıma,

Əl də gəzdirərdi künc-bucağıma.

Mənim bostanıma, könül bağıma,

Əlləmə daşları atırmış, demə.

Bir vaxt dadanmışdı dənliyimə də,

Özü dönük çıxdı verdiyi vədə.

Dostluq mənzilinə çatmadı gədə,

Vicdanı şöhrətə satırmış, demə.

                        

                                          2004