Gözlərin

                 Gözlərin

Gəldik qədəm-qədəm doqqaza qədər,

Zilləndi üzümdə qaldı gözlərin.

Dedim-gözlə məni bu yaza qədər,

Endi kirpiklərin, doldu gözlərin.

Dayandıq üz-üzə, tutduq əl-ələ,

Baxışlar görüşdü təbəssüm ilə.

Bülbül havalandı sarıldı gülə,

Can alan, canımı aldı gözlərin.

Boylandın arxamca körpə əlik tək,

Axdı yanağına göz yaşı sel tək.

Coşdu, tüğyan etdi köksümdə ürək,

Əvəzi ovsuna saldı gözlərin.