Yol axtarıram.

Yol axtarıram.

Mənə yol göstərin, yol göstərənlər,

Enişsiz, yoxuşsuz yol axtarıram.

Tiri öz gözümdə görə bilmirəm,

Özgənin gözündə qıl axtarıram.

Dağlara çıxmağa yol axtarıram,

Bu fani dünyaya zirvədən baxam.

Odu söndürmüşəm, kül axtarıram

Dilbilməz əlində qalıbdı yaxam.

Yalçın qayalara yol axtarıram,

Eşidəm kəkliyin zəngüləsini.

Atı itirmişəm, çul axtarıram,

Haqsızlar batırıb haqqın səsini.

Bir özgə aləm yolçusuyam mən,

Könlümdən əl çatmaz arzular keçir.

Çekilsin kənara qatı duman, çən,

Burdan dərdi keçir, intizar keçir.

Vicdanım soruşur:-hara gedirsən?

Orda yel əsibdi, qoz tökülübdü?

Qayıt, bu səfərdən, tez qayıt geri

Ora parça-parça buz tökülübdü!

Vətənə dönməyə yol axtarıram,

Uğursuz yollarda yığıldım cana.

Artıq başım dəydi əhliddaşına,

Pir deyib yapışdım Azərbaycana.