Gəlmişəm

Gəlmişəm

Əzizi şagirdim Faiq Bayramova.

Gəl sənə söyləyim dərdimi, qardaş

Yuxuda dağları gəzib gəlmişəm.

Əmliklər oynayan yaşıl çəməndə,

Qurbanlıq qoyunu kəsib gəlmişəm.

Ümidlə çıxmışam Şəfa pirinə,

Baxmışam Yalyurdun həndəvərinə.

Qanqallar cücərir gülün yerinə,

Mən də bu halətdən küsüb gəlmişəm.

Gördüyün yaylaqlar öz yerindədir,

Dərə yerindədir, düz yerindədir.

Bir zaman saldığım iz yerindədir,

Həsrətə, hicarana dözüb gəlmişəm.

Beçbulaqda izi qalıb babanın,

Gözələrdə gözü qalıb babanın.

O torpaqda özü qalıb babanın,

O yerdən əlimi üzüb gəlmişəm.

Bizi birləşdirən tellər qırıldı,

Yanan çıraqlarım söndü, qaraldı.

Xalıqverdi düşən yurdu qar aldı,

Əvəz, qasırğadan bezib gəlmişəm.