Əvəz Mahmud Lələdağ 80

SDU-da şair Əvəz Mahmud Lələdağın 80 illik yubileyi qeyd olundu

Oktyabrın 29-da Sumqayıt Dövlət Universitetində Filologiya fakültəsinin təşkilatçılığı ilə şairin 80 illik yubileyi qeyd edildi.

Tədbiri Humanitar Məsələlər üzrə prorektor, dosent Nizami Namazov açaraq bildirdi ki, universitetimizin qocaman əməkdaşı, sevimli müəllim peşəsi və yetirmələri ilə fəxr edən, ömrünün 60 ilini gənc nəslin təlim tərbiyəsinə həsr edən el ağsaqqlı, şair-publisist, yazıçı və dramaturq Əvəz Mahmud Lələdağın 80 yaşı tamam olur. Şair-dramaturqun ömür gün salnaməsi olduqca zəngindir. Bu səksən ilin yarım əsrdən bir az da çoxunu bədii yaradıcılığa həsr etmişdir. Onun zəngin bədii-poetik irsi zəminində dəyərli əsərlər meydana gətirmiş və milli ədəbiyyata töhfələr vermişdir. Şairin əsas qayəsi vətənə məhəbbətin, mənəvi-əxlaqi zənginliklərin təbiət gözəllikləri ilə vəhdətdə tərənnümündən ibarət olan yaradıcılığı bu gün də gənc nəslin tərbiyəsində öz əhəmiyyətini qoruyub saxlayır. O, öz qələmi ilə xalqa, vətənə, müstəqil dövlətçiliyə xidmət edir. 

Prorektor onu da vurğuladı ki, Əvəz Mahmud Lələdağ Azərbaycan Prezidenti İlham Əliyev tərəfindən “Tərəqqi” medalına, Azərbaycan təhsil nazirinin əmri ilə “Qabaqcıl təhsil işçisi”, KİV Həmkarları İttifaqının “Qızıl Qələm”, “İlin ən yaxşı müəllimi” müsabiqəsinin qalibi mükafatlarına layiq görülüb.

Filologiya fakültəsinin dekan əvəzi, dosent Avtandil Ağbaba şairin həyat yolu və yaradıcılığına qısa bir nəzər salaraq qeyd etdi ki, o, bacarıqlı pedaqoq, istedadlı şair olmağı ilə yanaşı həm də  xalq etnoqrafiyasını dərindən biləndir. Bu illər ərzində öz paklığını qoruyub saxlayan, vəfalı dost, sədaqətli qələm ustadı öz şeirləri ilə hər zaman milli-mənəvi dəyərlərimizin keşiyində dayanıb.

Şairin yubileyində Sumqayıt şəhər təhsil şöbəsinin müdir əvəzi Sabir Məmmədov öz ürək sözlərini bölüşərək bildirdi ki, dramaturq yaradıcılığında milli ədəbi-bədii ənənələrdən bəhrələnərək çağdaş problemləri, qayğıları, müasir dövrü, zamanın bədii lirikasını canlandırır. Qələm, söz ustadı olan şair həmçinin tarixə, keçmişə, milli-mənəvi dəyərlərə, qan yaddaşının oxunmamış səhifələrinə nəzər yetirir, vətənpərvərlik və milli ruhda şeirlər, hekayələr qələmə alır və geniş oxucu auditoriyasını da öz ətrafına cəmləyir.

“Sözün sehri” qəzetinin baş redaktoru Qafqaz Əvəzoğlu, universitetimizin professorları Nadir Kazımov, Məhəmməd Əhmədov, Adil Baxşəliyev, Qafar Ramazanov, Aslan Bayramov yubilyarı təbrik etdilər, ona sağlam can və qələminin hər zaman iti olmasını arzuladılar.

Əvəz Mahmud Lələdağ tədbir iştirakçılarına onun haqqında səsləndirdikləri xoş sözlərə görə  yaradıcılığında yer tutan dəyərli şeirləri ilə təşəkkür etdi.

Sonda Filologiya fakültəsinin tələbələri şairin müəllifi olduğu şeirlərdən parçalar söylədilər.

SDU-nun Mətbuat xidməti