Gözlərin

Gözlərin

Gur zülfün dağların gur şəlaləsi,

Az qalır canımı ala gözlərin.

Laləyanaqların bahar laləsi.

Necə də gözəldir ala gözlərin.

İncəsən gülşənin tər çiçəyi tək,

Xoşbəxt o kəsdir ki, səni sevəcək.

Kaş mənim olaydın, ay qarabirçək.

Kaş məni ovsuna sala gözlərin.

Qəlbindən kədəri, qəmi çıxart, at,

Ayna camalında gözəllik yarat.

Ülvi məhəbbətə, sevgiyə canat

İstərəm mənimlə ola gözlərin.

Könlündən keçəni danış, mələyim,

Dərddən xali olsun dərdli ürəyim.

Bəlkə Əvəz oldu bir gün gərəyin,

Zilənə üzümdə qala gözlərin.