Sahil duyğuları

     Sahil duyğuları

Sahildəyəm,

Hava sakit, səma aydın.

Bir aynadır mavi Xəzər,

Ağ göyərçin qanadı tək

Ağ ləpələr

Qırçın-qırçın aşa-aşa,

Pıçıldaşa-pıçıldaşa,

Şıltaq-şıltaq oynaşırlar.

İlham dolu bu sahilə

Onlar əcəb yaraşırlar.

Ürək açan bu gecədə,

Gözəllərdən gözəl olub

Bidrlənmiş Ay necə də!

Nə qəşəngdir qar sinəsi.

Gur suların aynasında.

Bir qısqanclıq duyuram mən,

Yerlə Göyün arasında.

Elə bil ki, təzə gəlin

Sığallanıb, tumarlanıb.

Yol gözləyən ala gözlər,

Xumar olub xumarlanıb.

Çiçək-çiçək ulduzları

Öz bağrına basıbdır ay.

Düzüm-düzüm qaş-daşını,

Yaxasından asıbdır Ay.

Qarış-qarış sırğaları

Qulağına taxıbdır Ay.

Canlar alan bu camalla,

Can sirdaşı al Günəşin

Pişvazına sıxıbdır Ay!