Qardaş.

Qardaş.

Qərib qürbət eldə neçə illərdi,

Dözüb keçinirəm bir təhər, qardaş

Səhər yuxusuna yadırğamışam

Nə axşam bilirəm, nə səhər, qardaş.

Xəyalım dolanır, aran-dağ gəzir,

Gözlərim hər yerdə buz bulaq gəzir.

Əllərim uzanır bağca-bağ gəzir,

Hikkədən tökürəm qanlı tər, qardaş.

Günlər atlı olub mən də piyada

Bir kimsə hələlik yetməyir dada.

Qəlbim tel-tel olur, düşəndə yada

O sərin çeşmələr, gözəllər, qardaş.

Qızıl armudumuz yuxumdan çıxmır,

Pöhrələr inciyib sözümə baxmır

Çiçəklər küsübdü şeh sırqa taxmır

Əvəzi üzübdü dərdi-sər, qardaş.