Ordumuz ,bəladan bizi sən qurtar.

Ordumuz ,bəladan bizi sən qurtar.

Sübhədək yuxuma haram qatıram,

Oturub Ay ilə dərdləşirəm mən,

Yasdan qurtarmamış, yasa batıram,

Sevinci buraxıb, dərd eşirəm mən.

Iyirmi qış keçib, iyirmi bahar

Gör indi babamın köçü nə çəkir.

Div kimi yuxuya gedib adamlar,

Xoruzlar səsini içinə çəkir.

Hər yerdə Vətən var, torpaq var, daş var,

Ya Rəbb, sülhün nuru niyə yayılmır?

Cahanda istəkli dost var, sirdaş var.

Görən bu yatanlar niyə ayılmır?

Yarın fərağından solub gəlinlər,

Şəhid balasını ana ağlayır.

Eyş-işrət içində deyib-gülənlər,

Belə biganəlik məni dağlayır.

Gözümün yuxusu ərşə çəkilir,

Qəmdən yatmayanın halı qolaydı.

Ilahi, sinəmə dağlar çəkilir,

Yurdun gediş-gəliş yolu qolaydı.

Uğursuz ayların sayı azalmır,

Bezib bu həyatdan nənələr indi.

Açılan güllənin hayı azalmır

Gözəllər çəkirlər gör nələr indi.

Oyanmaq vaxtıdır hamı yatıbdır,

Bülbüllər salınıb bəlkə qəfəsə.

Bəlkə azançının səsi batıbdı,

Səhərlər quşlar da vermir səs-səsə.

Qəflət yuxusundan ayılmırıq biz,

Hələ açılmamış qönçəm göynəyir,

Vətən deyə-deyə qaldıq Vətənsiz,

Varlığım sarsılır, içim göynəyir.

Qartalın yuvasın dağıdıb qarğa,

Laçınlar qırğının əlinə keçib.

Sonasız göllərdə üzür qurbağa,

Tülkülər yurduma süpürgə çəkib.

Dərddən xali olsa könlüm azacıq.

Sevinc gəlib keçər yanımdan belə

Dağların yolları olsaydı açıq,

Gedib qovuşardım sevdiyim gülə.

Biz də bir gün görək fani dünyada

Bizim əməlimiz, işimiz haqdır.

Bunu yaxşı bilir bütün dünya da,

Bu sitəm əvəzsiz qalmayacaqdır.

Təsəlli tapmıram, həmdəmim yoxdu,

Tale üz döndərib, üzümə baxmır.

Içimdə tığlanan dərd-qəmim çoxdu,

Ürəyim tərsləşib, sözümə baxmır.

Düşmənə əzab da, ölüm də azdır,

Qışın sazağıdır onun nəfəsi.

Xudaya, yağının yolunu azdır,

Kəsilsin gülşəndən bayquşun səsi.

Aqillər demişkən-nahaq ucalmaz

Haqq gəlib nahaqqın gözünü tutar.

Kənardan baxmaqla düyün açılmaz

Ordumuz, bəladan bizi tez qurtar.