Az ömür, mənalı ömür


Az ömür, mənalı ömür

Dəyərli  dostum yazıçı Famil Qaracallı ilə çox yerlərə səfər etmişik, oxucularla görüşlər keçirmişik. O, həmişə fərəhlə, fəxr ilə deyərdi:
-Qubadlı rayonlarının 40 evli Qaracallı kəndindən 4 nəfər elmlər doktoru, 12 nəfər elmlər namizədi, bir nəfər yazıçı, bir nəfər də böyük şair çıxıb. Məni maraq götürərdi:
-Deyək ki, yazışı Famil özüdür, bəs şair kimdir? Bir dəfə söhbət əsnasında soruşdum:
-Famil Qaracallı, yazıçını bildim ki, sənsən, fəxr ilə dediyin şair kimdir?
Onun bir mənalı baxışı vardı, məni başdan ayağa süzdü, gülümsədi:
-Əli Ağa Aslan! Sonra başladı şairi tərifləməyə, şeirlərindən nümunələr deməyə.
Mən çox təəssüfləndim ki niyə indiyə qədər şair Əli Ağa Aslanı tanımamışam?
Imkan tapdım Əli Ağa Aslanın kitablarından əldə elədim, oxudum şeirlərini. Şeirlərin hənirtisi içimi göynətdi, sinəmi dağladı.
Yaramın qaysağını qopardan şeirlər, Əli Ağa Aslanın doğulub boya-başa çatdığı ellərin niskili, ağrı-acısı, Vətən həsrəti, yurd yanğısı, torpaq harayı, el adət-ənənələrindən doğan, zəhmətlə, qeyrətlə, məhəbbətlə, vicdanı paklıqla yoğurulan, hikmətlərdən ibarətdir.
Şeirləri oxuduqca xəyal biləyimdən tutub məni Zəngəzur dağlarına çıxardır, dağ ucalığından açılan doğma mənzərələr ürəyimi riqqətə gətirdikcə nələr itirdiyimi dərk edirəm, qeyrət ucalığından itirdiklərimi-Üçağızı, Üçtəpəni, Yantəpəni, Qılıncyalı, Göbəkdaşı, Calbayırı,  Bərguşadı, Həkərini tapmağa çalışıram!
Əli Ağa Aslanın şeirlərində ilkinlik, kəndçilik, kəndçi vüqarı, yurda hərislik etirazı qabarıq şəkildə diqqəti cəlb edir. Şeirləri ilə tanışlıqdan sonra şairinin özü ilə görüşmək qərarına gəldim. Onun oxucularla, şagirdlərlə görüşünü təşkil etmək fikrinə düşdüm. Istədiyimə nail ola bildim. Olduqca sadə, mehriban, mülayim təbiətli, ləngər yerişli, təvazökar, dodağında təbəssüm yurd salan şairlə- Əli Ağa Aslanla üz-üzə dayandım, həmsöhbət oldum onunla. Bütün suallara çox qısa cavab verməklə kifayətlənirdi. Sumqayıt şəhər 25 №-li məktəbdə şairlə görüş baş tutdu. Şagirdlərin ifasında onun dəyərli şeirləri səsləndi. Bu maraqlı görüşdə şairin qələm dostu, şair, publisist Qafqaz  Əvəzoğlu da iştirak edirdi. Mənə elə gəldi ki, Əli Ağa Aslanla Qafqaz  Əvəzoğlu həm də yaxın dostlar. Zəndim məni aldatmamışdı, elə də varımış.
Sonralar Qafqaz  Əvəzoğlu tez-tez məktəbə gələrdi, görüşün təəssüratlarından söhbət açardıq. Əli Ağa Aslanın qoltuğa qısılmağı, əyilməyi sevməyən, mərd, gözü-könlü tox insan olduğundan ağız dolusu danışardı Qafqaz  Əvəzoğlu. Çox təəssüflər olsun ki, Əli Ağa Aslanı- istedadlı şairimizi vaxtsız itirdik.
Bu gün şairin yarımçıq qalan arzularını onun sədaqətli dostu Qafqaz  Əvəzoğlu tamamlamağa can atır. Əli Ağa Aslanın işıq üzü görməyən əlyazmalarını araşdırır, üzə çıxardır, qəzet və kitablar vasitəsi ilə oxuculara təqdim edir.
Əli Ağa Aslanın istedadı qarşısında baş əyirəm. O, ölməyən, ölməzliyə qovuşan əbədiyaşar şairdi. Az ömür, lakin mənalı ömür yaşadı Əli Ağa Aslan! Ruhu şad olsun!

Комментарии

Популярные сообщения из этого блога

Sumqayıt haqqında şeirlər

N. Gəncəvinin əxlaqi-etik baxışları

Dayaq olsa