Gəlir

    Gəlir

Allah.Allah gələnə bax, gələnə

Yağıb sinəsinə təzə qar, gəlir.

Dodağından şirin gülüş süzülür

Min naz ilə o vəfalı yar gəlir.

Xeyli vaxtdır yadırğayıb can cana,

Insafdırmı həsrət qala can, cana.

Gözəl olur qovuşanda can cana

Zəifləmiş gözlərə də nur gəlir.

Ürəyimi eyləyibdi yara yar,

Təbib qardaş, götür nəştər yara yar!

Cəhd elədi çatammadı yara yar

Bu gen dünya yarsız mənə dar gəlir.

Lələdağın yeri-yurdu hayandı,

Eşq oduna ha alışdı, ha yandı.

Əvəz gəlib yaman yerdə dayandı,

Gözlərinə yavaş-yavaş tor gəlir.