Olmasın

Olmasın

Bir arzum olubdu ağlım kəsəndən

Minnətli çörəyim, duzum olmasın.

Halal zəhmətimlə  qəpik qazanım

Haramla səksənim, yüzüm olmasın.

Ya Rəbbim, bəndəni gəl ac eyləmə

Sən mərdi, namərdə möhtac eyləmə.

Mənim əməyimi xərac eyləmə

Kimsənin varında gözüm olmasın.

Çox şükür  İlahi, səbrin böyükdür

Tənəli kəlmələr çox ağır yükdü.

Ürəyim kürədir sinəm körükdür,

Könül bulandıran sözüm olmasın.

Əltutmaq Əlidən qalıb, deyirlər,

Əlaçıq insanlar olub deyirlər

Dünya hey boşalıb dolub deyirlər

Çoxuna  bərəkət, azım olmasın.

Oğuldan oğlum var, qızdan qızım  var

Teli min havalı telli sazım var

Kasıb ocağımda odum közüm var

Özgə ocağından közüm olmasın.

Əvəz, öyümürəm var-dövlətim var

Nadanlar  yanında az hörmətim var

Elimə, obama sədaqətim  var,

Pislər cərgəsində izim olmasın.