Dünyada elə dahi tapılmaz ki...

Dünyada elə dahi tapılmaz ki...

Dərin bilik, möhkəm bacarıq, yüksək tərbiyəlilik zirvəsinə gedən yolun mahir bələdçisi müəllimdir. Dünyada elə bir dahi tapılmaz ki, onun yoluna nur səpən müəllim olmasın, o dahi müəllimdən dərs almasın.

Elə buna görə də bəşəriyyatın aparıcı qüvvəsi olan müəllim əməyi danılmazdır. Aqillərimiz demişdir:

-Bağ bağbansız, bəşər övladı müəllimsiz keçinə bilməz! Müstəqil dövlətimizin tərəqqisi üçün inkişaf etmiş qabaqcıl ölkələrin ziyalıları səviyyəsində dura biləcək yüksək keyfiyyətlərə görə onları ötüb keçməyə qadir olan, sağlam düşüncəli, vətəndaşlar yetişdirmək, tərbiyə etmək onları həyata hazırlamaq həmişə olduğu kimi bu gün də müəllimin qarşısında duran başlıca vəzifələrdən biridir. Hazırda dünyada gedən qloballaşma prosesi Respublikamızın ictimai-siyasi həyatına təsir göstərdiyi kimi təhsil islahatlarında da özünü qabarıq şəkildə göstərir. Təhsilin humanistləşdirilməsi, demokratikləşdirilməsi,  beynəlxalq standartlara cavab verməsi, milli-mənəvi dəyərlərin çağdaş dünyaya inteqrasiyasıbu gün hər bir təhsil işçisini dərindən düşündürməli, onu yeni texnologiyalardan bacarıqla istifadə etməyə yönəltməlidir. Bu vəzifənin icrası, həyata keçirilməsi üçün təhsil islahatlarının aparıldığı bir dövrdə bəşəri, milli-mənəvi dəyərlərə söykənərək milli təhsilimizi yeni təlim metodlarının inkişafına yönəltmək vəzifəsi yenə müəllimin üzərinə düşür. Dərin və  hərtərəfli biliyə, bacarığa, praktiki hazırlığa, yüksək mədəniyyətə, məsuliyyət hissinə, mütərəqqi dünya görüşünə malik olan və onu daim inkişaf etdirməyə çalışan şəxsiyyət formalaşdırmaq,  soykökünə, Azərbaycan xalqının azadlıq və demokratoya ənənələrinə sadiq qalan, ürəkdən bağlı olan, xalqın milli əxlaqı, humanist, mənəvi və mədəni dəyərlərinə dərindən yiyələnən, onu göz-bəbəyi kimi qoruyan, daim inkişaf etdirən, ailəsini, Vətənini, torpağını, millətini, dilini, dinini sevən onu həmişə ucaltmağa çalışan, dövlətinə, dövlətçiliyinə vəfalı olan, ümumbəşəri dəyərlərə yiyələnən, insan hüquqları və azadlıqlarına hörmət edən, müstəqil, yaradıcı düşünən, biliyinə, yüksək əxlaqi mənəvi keyfiyyətlərinə görə dünyanın ən qabaqcıl ölkələrinin vətəndaşları səviyyəsində dura bilən sağlam yurddaşlar yetişdirmək,   Azərbaycanı dünyanın inkişaf etmiş demokratik dövlətlərindən birinə çevirməyə qadir olan insan tərbiyə etmək kimi şərəfli, məsuliyyətli vəzifənin öhdəsindən gəlmək yenə müəllimdən tələb olunur. Bəşəriyyətin ən görkəmli dahiləri müəllimin fəaliyyətinə, onun cəmiyyətin inkişafındakı roluna tərəddüd etmədən həmişə yüksək qiymət vermişlər.

Ulu öndər, Ümummilli lider, dahi şəxsiyyət Heydər Əlirza oğlu Əliyev demişdir.

-Müəllimlik peşəsi asan peşə deyil. Bəziləri belə hesab edirlər ki, hər adam müəllim ola bilər. əslində bu belə deyil. Müəllimliyə gedən adamın zəngin, biliyi dərin, saf vətəndaşlıq vicdanı, sənətkarlıq məharəti olmalıdır. Müəllim bütün  xalqın hörmət və etimadını qazanmışdır. Cəmiyyətimizin ümidi, gələcəyi olan uşaqların təlim-tərbiyəsi kimi ən mühüm, ən vacib iş ona etibar edilmişdir. Müəllim öz biliyini, təcrübəsini, qiymətli nəyi varsa, hamısını şagirdlərinə, xalqına bəxş edir. Mən dünyada müəllimdən şərəfli ad tanımıram. Hər kəs öz tərcümeyi-halı, öz həyat yolu ilə məktəbin, müəllimin insanın həyatında nə kimi rolu olduğunu bilir və onu qiymətləndirir. Mən isə bütün varlığımla, keçdiyim həyat yolu ilə həmişə məktəbə, müəllimə borcluyam. “Hər birimizdə müəllimin hərarətli, qəlbinin bir zərrəciyi var”. Bununla bərabər xalq müəllimin qarşısında yüksək tələblər qoymağa da haqlıdır. Insana daim təsir göstərən müsbət  və mənfi amilləri formalaşdıran ailə məktəb və ictimaiyyətdir. Burada məqsədyönlülük vahid istiqamətə yönələn təsirlərin cəmi həlledici rol oynayır. Güc enerji, məqsəd və təsir birliyi bizi son məqsədə-təhsil islahatının ideyalarının bütövlükdə həyata keçirməyə imkan verir. Bundan ötrü respublikamızda hər cür imkan və şərait, əvəzi olmayan zəngin həyat təcrübəsi var. Bu gün bütün pedaqoji kollektivin qarşısında duran əsas vəzifə bütün imkanlardan maksimum və yaradıcı istifadə etməkdən ibarətdir.

Müəllim sinifdə çevik, gözü açıq, hər bir şagirdə qarşı diqqətli olmalıdır. Əks halda böyük Sədi Şirazi deyimi kimi olar.

“Müəllim olarsa sakit, mülayim,

Uşaqlar bazarda oynayar daim”.

Müəllimin savadı, dünyagörüşü, həyat hadisələrindən baş çıxarması, dözümü, təşkilatçılıq bacarığı olmasa onun dərsi həmişə maraqsız və cansıxıcı olacaq. Ulu Zərdüşt vaxtı ilə demişdir:

“Pis müəllim şüuru korlayır, ağılın inkişafını ləngidir, təlim-tərbiyəni fəsada çevirir”. Böyük yunan filosofu, alimi Platon müəllilimin məsuliyyətini dərk edərək yazırdı:

“Pinəçinin bir cüt ayaqqabını pis tikməsi bir nəfərə ziyan vurduğu halda, bir müəllimin pis işi cəmiyyətə ziyan gətirər”.

Bu gün ölkəmizdə təhsil islahatı uğurla həyata keçirilir, bütün sahələrdə yeniləşmə gedir. Əlbəttə bu yenilik, yeni üsul, yeni təlim təhsil sahəsində də özünü göstərir. Köhnə, maraqsız, ənənəvi metoddan uzaqlaşmaq, millətin gələcəyi olan gənclərin inkişafına maneçilik törədən ünsürlərdən qaçmaq lazımdır. Yeni təlim həyatın tələbidir. Interaktiv təlim şagirdlərin bir-biri ilə əməkdaşlıq etməsinə, bir-birini hörmətlə dinləməsinə şərait yaradır.

Mən istərdim ki, müəllimlik peşəsini ucuzlaşdırmamaq üçün müəyyən qabiliyyət imtahanları tətbiq edilsin, bu peşəni seçənlərin bilik səviyyəsi, dözümü, təşkilatçılıq bacarığı, həvəsi nəzərə alınsın. Axı gələcəyimiz müəllimin intellektual səviyyəsindən, savadından, dünyagörüşündən həyat hadisələrindən baş çıxarmasından asılıdır. Dünyada elə bir dahi tapılmaz ki müəllimdən dərs almamış olsun. Bir vacib məsələdə diqqətdən yayınmamalıdır. Məktəblərdə sinifin sayı azalır, müəllimin sayı dəyişmir. “Mənəmlik” baş qaldırır.

Bu gün Təhsil Nazirliyinin atdığı cəsarətli addımı alqışlayıram. Müəllimlərin imtahan verməsi ilə təhsilimizdə bir saflaşma, bir paklaşma yaranacaq. Savadsız, öz üzərində çalışmayan köhnəlikdən əl çəkməyən, yeniliklə barışmayan müəllimlərdən xalqın canı qurtaracaq. Bir vacib məsələni də qeyd etmək yerinə düşər. Mənə elə gəlir ki, bugün ki, qiymətləndirmə çox vaxt ğzünü doğrultmur. Belə halları aradan qaldırmaq üçün mövzular qurtaran kimi təkrar yoxlama aparmaq, şagirdin mövzunu mənimsəmə qabiliyyətini üzə çıxarmaq və onun obyektiv qiymətini vermək lazımdır.

Bu gün təhsil işçilərinə dövlət qayğısı göz qabağındadır. Mənim yaşadığım və işlədiyim Sumqayıt şəhərində təhsilə yönəldilən məqsədyönlü işlər dövlət qayğısının bariz nümunəsidir. Bütün məktəblərin dam örtüklərinin əsaslı təmiri bir sıra məktəblərdə qazanxanaların tikilməsi, istilik sistemlərinin yenidən qurulması böyük irəliləyişdən xəbər verir.

Möhtərəm prezidentimiz Cənab İlham Əliyevin “Uşaqlar  yaxşı məktəblərdə oxumalı, müəllimlər də yaxşı məktəblərdə işləməlidirlər” fikri bu gün artıq reallığa çevrilmişdir. Müəllimlərin əməkhaqlarının artırılması, mükafatlandırılması, fəxri adlarla  təltif  edilməsi, müəllimlərin sosial müdafiəsinin gücləndirilməsi istiqamətində atılan addımlar təhsil işçiləri üçün böyük stimul olmaqla, onların məsuliyyətini də artırır. Möhtərəm prezidentimiz Cənab İlham Əliyevin qərarı ilə ölkəmizdə “Ən yaxşı ümumtəhsil məktəbi”, “Ən yaxşı müəllim” müsabiqəsi keçirilir. Qalib gələn hər məktəbə 10 min manat , hər müəllimə 5 min manat birdəfəlik pul mükafatı  verilir. Bu da müəllimin ictimaiyyət arasında nüfuzunu artırır. Sumqayıt şəhərində 19 ümumtəhsil məktəbi, “Ən yaxşı ümumtəhsil məktəbi”, 36 nəfər “Ən yaxşı müəllim” müsabiqəsinin qalibi olublar. Müstəqillik dövründə 27 nəfər müəllim Azərbaycan Respublikasının “Əməkdar müəllim” fəxri adına, 27 nəfər “Tərəqqi ” medalına layiq görülmüşdür.

Minarə Tahirova “Şöhrət” ordeninə, Prezident təqaüdünə, Ofelya Babayeva “Tərəqqi” medalı,  “Şöhrət” ordeni almış, “Əməkdar” müəllim fəxri adına layiq görülmüşdülər. Ali məktəblərə qəbul zamanı yüksək bilik nümayiş etdirən tələbələr 2001-2014-cü  illərdə  102 nəfər Sumqayıt şəhər məktəblərinin məzunları Prezident təqaüdünə layiq görülmüşlər. Azərbaycan müəlliminin şərəfli adıni daha da  yüksəltmək, gələcəyimiz olan şagirdlərə ürəkdən  dərin bilik vermək hər bir müəllimin Vətən qarşısında, xalq qarşısında mənəvi borcudur.