Lələdağın söz dünyası

Lələdağın söz dünyası

Bu günlərdə şair Əvəz Mahmud Lələdağla Sabunçu  rayonu Pirşağa qəsəbəsindəki 10 №li internat məktəbdə görüş oldu. Görüşdə müəllimlər, şagirdlər, valideynlər iştirak edirdilər. Yığıncağı məktəbin direktoru, respublikanın əməkdar müəllimi Dilarə xanım Əliyeva açdı. O qonaqları salamladı və xoşgəlmisiz dedi. Dilarə xanım poeziyamızın şirinliyindən, qəlbə yatımlılığından, sözün qüdrətindən söhbət açdı. El deyimlərində deyildiyi kimi «qılınc yarası sağalar, söz yarası sağalmaz»! Dilarə xanım sözü aparıcılara verdi. Şagirdlər Əvəz Lələdağın 55 illik yaradıcılıq yoluna nəzər saldılar və şeirlərdən nümunələr söylədilər. Görüşdə gənc aşıq İsmayıl Əhmədovun çaldığı «Ruhani» saz havası məclisi daha da gözəlləşdirdi. Sonda şair Əvəz Mahmud Lələdağ görüşü təşkil edənlərə minnətdarlığını bildirdi və yeni yazdığı şeirlərindən, poemalarından parçalar söylədi. Toplantı şagirdlərin oxuduqları şən mahnılarla başa çatdı.

                                      ******

Bakı şəhər Xətai rayonunun 95 saylı orta məktəbində Əvəz Mahmud Lələdağla məktəblilərin, müəllimlərin görüşü oldu. Görüş dövlət himni ilə başladı. Məktəbin direktoru Tahir Süleymanov qonaqları salamladı. Əvəz Mahmud Lələdağ poeziyanın təbiiliyindən, torpağa bağlılığından, Vətənə sadiqliyindən, dilinin şirinliyindən ağızdolusu söhbət açdı. Sonra  məktəbin 600-dən yuxarı bal toplayan prezident təqaüdünə layiq görülən məktəblilər barəsində fərəhlə danışdı. Şagirdlər hazırladıqları şeirləri sazın müşayəti ilə ifa etdilər. Sonra dramaturq Əvəz Lələdağın «Qorxaq» tamaşasından bir parçasını şagirdlərin iştirakı ilə tamaşaçılara göstərdilər. Söz tanınmış şair, dramaturq və publisist, AYB, AJB, AAB üzvi  Əvəz Lələdağa verildi. Şair görüşü təşkil edənlərə təşəkkür etdi, yeni şeirlərini oxudu, şagirdlərin, müəllimlərin  suallarını cavablandırdı. Sazlı-sözlü görüş başa çatdı.