O çiçəyi ayaqlama

O çiçəyi ayaqlama

O çiçəyi ayaqlama, ay dəli,

O çiçəkdə sevənlərin gözü var.

Eşqin odu tezə yanır tacında,

Dodağında məhəbbətin közü var.

O çiçəyi ayaqlama, ay dəli,

Didəsinə şeh damcısı düşməyib.

Yanağına yar nəfəsi dəyməyib.

O sütüldü, düzəməlli bişməyib.

O qönçələr sevənləri səsləyir,

Nəsillərə deyiləsi sözü var.

O bətnində gül balalar bəsləyir,

Ürəyində neçə dərdin izi var.

Bu torpağın damarında qandı o,

Gəl baş əyək, bu müqəddəs torpağa.

Könüllərə sevincdir o, candır o,

Cəhd eləmə o çiçəyi qırmağa!

O çiçəyi ayaqlama birdə sən,

Sinəində Xocalının dərdi var.

Bu dəhşətli faciəni bilməsin,

O bizlərə daha böyük dərd olar.

O çiçəyi ayaqlama, ay dəli!