Dönəsiyəm mən

Ay nigarım, evdən çölə çıxsana,

Axı görüşünə gələsiyəm mən.

Eşqin odu alovlanır içimdə,

Kərəm tək yolunda yanasıyam mən.

Heç bilmirəm boylanırsan hara, sən,

Qəsd eyləyib məni saldın dara sən.

Gəl qarşımda saçlarını dara, sən

O siyah tellərin dəlisiyəm mən.

Tər gülümü əğyar gəlib dərdimi?

Dar günümdə, təzələmə dərdimi.

Ürəyimdə zindan olan dərdimi,

Oturub səninlə böləsiyəm mən.

Gəzdiyim çəmənə bax, çölə bax,

Ay insafsız, bir az dönüb belə bax

Gümüş kəmər sarılıbdı belə, bax

Ölsəm də qoynunda öləsiyəm mən.

Taledən verilən qismətim olsa,

Elimin yanında hörmətim olsa,

Əcəldən bir azca möhlətim olsa,

Görüş yerimizə dönəsiyəm mən.

Hələlik yatıbdı baxtı Əvəzin,

Dərdinin dərmanı yoxdu Əvəzin,

Bir gözəl evini yıxdı Əvəzin,

Ondan qisasımı alasıyam mən.

07.07.2004

İtirdim

Çərxin dönsün fələk, koman dağılsın,

Səfasın görməmiş yarı itirdim.

Gəzdiyim dağlardan əlim üzüldü,

Yanğımı söndürən qarı itirdim.

Allah, dodağımda gülüşüm sındı,

Görüşə gedəndə görüşüm sındı.

Vüqarım əyildi, duruşum sındı,

Namusu, qeyrəti, arı itirdim.

Getdim əhval tutam, görə bilmədim,

Ona öz könlümü verə bilmədim.

Bağ saldım barını dərə bilmədim,

Zəhmətim zay oldu, barı itirdim.

Çiçəklər sayrışır ulduzlar kimi,

Güllər xumarlanır quzular kimi

Başıma fırlanan o qızlar kimi,

Neçə pətək dolu arı itirdim.

Taleyin yazısı pozulmaz, dədə,

Xəyallar doğru tək yozulmaz, dədə.

Əvəzin dərd yükü azalmaz, dədə,

Yetkin şamamanı, narı itiridm.

20.10.2004

Oldu

Bir nurdan yaratdı yaradan məni,

Bir damla böyüdü pürkamal oldu.

Daraqlar batmayan, şəvə saçlarım,

Dönüb bəyaz oldu, dönüb çal oldu.

Həyat çeşməsindən nur aldı gözüm,

Baldan şiurin oldu söhbətim, sözüm,

Bəlkə də olmazdı məndə bu dözüm,

Şükür ki, dostlarım əhli-hal oldu.

Altmış doqquzumu yola salmışam,

Könlümün quşunu tora salmışam.

Özümü görünməz hala salmışam,

Mənim düşündüyüm xam xəyal oldu.

Bir müddət sevdaya qarışdı başım,

Hər yerdə tapıldı könül sirdaşım.

Əvəz, bəla oldu bu yetmiş yaşın,

Bir qıza söz atdın, qalmaqal oldu.

2005

Sənəm

Hara getdin, harda qaldın,

Qayıtmadın niyə, sənəm.

Axşam, sabah ah çəkirəm,

Naləm çatır göyə, sənəm.

Qara gəldi qara bəxtim,

Yollarına bir də baxdım.

Tarac oldu tacım, taxtım.

Qalmadı bir dəyə, sənəm.

Nəzərdən saldın Əvəzi,

Gözündə qaldı həvəsi.

Arzum budur, yad nəfəsi,

Camalına dəyə, sənəm.

01.11.2004

Gəldi, nə gəldi

Bəxtimin düyünü birdən açıldı,

Amanım,zamanım gəldi, nə gəldi.

Həsrətin əlindən təngə gəlirdim,

O dinim-imanım gəldi, nə gəldi.

Dünyamı oyadan xoş səsi oldu,

Boynuma sarılan həvəsi oldu.

Qəlbimi isidən nəfəsi oldu,

Halıma yananım gəldi, nə gəldi.

Bədənim səksəndi,cahan oyandı,

Könlümün yanğısı bircə o yandı.

Alışdım,oduma yandı, oyandı,

Atəşim, inamım gəldi, nə gəldi.

Alnıma yazılıb taledən qismət,

Həmdəmim eylədi mənimlə söhbət,

Gözəl keyfiyyətdi, gözəldə ismət,

İsmətli cananım gəldi, nə gəldi.

Qərarım, qəsəmim yox idi,Allah,

Kədərim sevincdən çox idi, Allah.

Yarama məlhəmdi, yaxıdı, Allah,

Dərdimi qananım gəldi, nə gəldi.

Yenidən canlandı o dərə, o dağ

O görüş yerimiz, o baxça, o bağ.

Gözün aydın olsun, Əvəz Lələdağ,

Qayğısız dövranım gəldi, nə gəldi.

Görmüşəm

Bir zaman yaylaqda, bulaq başında,

Tülfə gözəlləri mən də görmüşəm.

Məhəbbət yolunda, sevgi yolunda,

Duman da görmüşəm, çən də görmüşəm.

Görmüşəm canalan şux gözəlləri,

Şümşad barmaqları, gözəl əlləri.

Gəl qoyum sinəmə,gözəl, əlləri,

Dərimin çarəsin səndə görmüşəm.

Düzdərdə xəyala daldığım zaman,

Məhəbbət sazını çaldığım zaman.

Eşqin divanəsi olduğum zaman,

Səni ərşdə, kürşdə gendə görmüşəm.

Adımız çıxmışdı eldə, mahalda,

Səni axtarırdım yamacda, yalda.

Gözlərim qalırdı gəldiyin yolda,

Lələdağ Əvəzi onda görmüşəm.

2005

Gələ

Könlümün bax belə kövrək çağında

Allahım,nə ola cananım gələ.

Dərdindən xəstəyəm, hicran xəstəsi,

Dərdə çarə qılan loğmanım gələ.

Oturaq üz-üzə,qabaq-qabağa

Dodağım toxuna o gül dodağa

Tuta biləyimdən çəkə yatağa

Naz ilə canımı alanım gələ

O cənnət bağında yatır var, yatır

Mərmər sinəsində bir cüt nar yatır

Əvəz Lələdağ da intizar yatır,

Dərdimi,sərimi qananım gələ.

2005

Ürəyim

Bu gərdişin dürlü-dürlü dərdinə,

Tab gətirə gərək, dözə ürəyim.

Yön çevirə insanların mərdinə,

Namərdlərdən əlin üzə ürəyim.

Zalım fələk durub mənim qəsdimə,

Gecə-gündüz kədər yağır üstümə.

Bu çağımda məni qoydu pis günə,

Bəd övlad tək baxmır sözə ürəyim.

Beynim yatmır, yuxum ərşə çəkilir,

Ömür xalım ilmə-ilmə sökülür

Yazıq Əvəz yumaq kimi bükülür.

Qorxuram ki, məndən bezə ürəyim

2005

Gəl qayıdaq

Gəl qayıdaq o dağlara

Gülüm, ilin bu çağında.

İkimiz də həmdəm olaq,

Yataq gülün qucağında.

Üstümüzdə ulduz yansın,

Laylamızı sular çalsın.

Eşq odumuz alovlansın

Məhəbbətin ocağında.

Kədər olsun bizə yasaq,

Saza,sözə qulaq asaq.

Bir gün biz də yüyrük asaq,

Lələdağın otağında.

2005

Qalıb

Nə müddətdir səndən ayrı düşmüşəm,

Donmuşam, açılmır donum, ay mələk.

Qəm sacında qovrulmuşam,bişmişəm,

Məşhərəcən yanar canım, ay mələk.

Heç yerdə bir qərar tuta bilmirəm,

Səni axtarıram xeyirdə, şərdə,

Gecələr sübhədək yata bilmirəm,

Arzum tora düşüb, ürəyim dərdə.

Əhdim şikəst olub, istəyim zəlil,

Həyatda doyunca kam almadım mən.

Kədər üstələyir məni ilbə il,

Çəkilmir yolumdan nə duman, nə çən.

Sənsizəm gecələr yuxum qarışır,

Hicran yaman yerdə yəkləyir məni

Gündəlik qayğılar başımdan aşır,

Tale qəm-qüssəylə yükləyir məni.

Ta həyat eşqiylə döyünmür ürək,

Həsrətin qıvrılıb sinəmdə yatıb.

Sənin varlığınla öyünmür ürək,

Xeyirxah əməlin çəməndə yatıb.

Yolum bitdi, ağzım daşa dirəndi,

Ömrün bu çağında itirdim səni.

Bəxtimin gülşəni solub, örəndi,

Gözümün içində bitirdim səni

Sən köçdün, mən qaldım yurda gözətçi,

Könlüm ev-eşiyə sığışa bilmir.

Kasıb komamızdan perik düşüblər,

Uşaqlar bir yerə yığışa bilmir.

İlk görüş yerimiz yadıma düşür,

O vaxtdan, əzizim, əlli il keçir.

Xəbərim olmadan illər ötüşür,

Dünyadan qəhrəman oğullar köçür.

Yamanca sarsıdır yoxluğun məni,

Boynumu bükürəm yetim uşaq tək.

Sənsiz gəzəmmirəm çölü, çəməni,

Əlimi, qolumu bağlayıb fələk.

Əkdiyin ağaclar gözləyir səni,

Güllər sığalına tamarzı qalıb.

Gecələr tənhalıq dəng edir məni,

Canımda sənsizlik azarı qalıb.

01.11.2004

Zavallı qızın

Səhər-səhər bir qız çıxdı qarşıma,

Ayağı olmadı sayalı qızın.

Gözümün önündə sərildi yerə,

Sinəmi dağladı o halı qızın.

Sandım ki, ürəyim çıxdı yerindən,

Qıyğacı baxışla baxdı yerindən,

Yorğun maral kimi qalxdı yerindən,

Huşumu apardı camalı qızın.

Dedim ki,qəsdinə durmamışam mən,

Taleyin hökmüdür, ay gümüş bədən.

Dedi:-Heç xəcalət çəkirsənmi sən?

İçimi göynətid sualı qızın.

Dedim gəl könlümü bahar, yaz eylə,

Mənimlə aranı bacar saz eylə.

Bu yazıq bəndəyə az qisas eylə,

Gördüm ki, dolandı xəyalı qızın.

Əndamı çürümüş nə xəyal etdi?

Gedib əhvalatı ərzi-hal etdi.

Ağbirçək anası qalmaqal etdi,

Həyası yox oldu, həyalı qızın.

Qızmış pələng kimi üstümə cumdu,

Məndən töhfə umdu,məndən pay umdu.

İki göy kağızla ağzını yumdu,

Məni düşündürdü amalı qızın.

İl oldu Əvəzin bir günü, Allah,

Yazıldı tarixə «pir»günü, Allah.

Sevinclə ərisin hər günü, Allah

Canı ağrımasın zavallı qızın.

Nəyimə gərəksən

Vayımda ağlama, toyumda gülmə,

Şad gündə yendirib yanıma gəlmə.

Sevincimi bölmə, dərdimi bilmə,