Zəngəzur

Zəngəzur

Dünyada nə çoxdu gözəl  yer, mekan,

Mənimsə qəlbimdə birdi Zəngəzur.

Dolanım başına Kəbə daşı tək,

Ocaqdı Zəngəzur, pirdi Zəngəzur.

Dağlarının sinəsində qar yatar,

Yaylağında dövlət yatar, var yatar.

Tər güllərin qucağında yar yatar,

Sevincə çevirər dərdi Zəngəzur.

Zirvələri ağ çarşaba bürünər,

Yamacıyla qatı duman sürünər.

Bulaqları ayna kimi görünər,

Hələ açılmamış sirdi Zəngəzur.

Dağların sirrini çobanlar bilir,

Arılar çiçəyin gözünü silir.

Gölünə yaşılbaş sonalar gəlir,

Qonaq qarşılayan yerdi Zəngəzur.

Koroğlu nərəsi var qayasında,

İldırım iz qoyub hər qayasında.

Qoymaz məskən sala sar qayasında,

Dəyişməz namərdə mərdi Zəngəzur.

Gözüm yolda qalıb,qulağım səsdə.

Hicrinə dözməyib olmuşam xəstə,

Nə qədər bülbülün öldü qəfəsdə.

De, kimə söyləyim dərdi,Zəngəzur?!

Hələ sərt küləklər əsir qoynunda,

İgidlər saxlanır əsir qoynunda.

“Çobanbinə” haylar gəzir qoynunda,

Kim səni güdaza verdi,Zəngəzur?!

İnsafsız,mürvətsiz zamana gəldi,

Namərdin oxları köksümü dəldi.

Sərçə qəhqəh çəkib qartala güldü,

Sənə də çaqqallar hürdü,Zəngəzur.

Onsuz yer üzünü fəlakət alıb,

Yurdda nə yurd qalıb ,nə yurddaş qalıb.

Gavurlar yoluna əlləmə salıb,

O geniş yolların dardı,Zəngəzur.

Ağdü Zəngəzurun kilid-açarı,

Ox kimi atılar düşmənə sarı.

Yağı aşa bilməz bizim hasarı,

Yağı qabağında nərdi Zəngəzur.

Birinci taqsırı axtarın məndə,

Özüm ayağımla düşdüm kəməndə.

Çörək itirən də,itirməyən də,

Qırmızı üzümə durdu,Zəngəzur.

Nənəmin ,babamın məzarı orda,

Hasarməhləsinin hasarı orda.

Fərhadın külüngü ,düsəri orda,

Vallah qaytaracam yurdu,Zəngəzur.

Lələdağ, göz yaşı tökmək əbəsdir,

Edilən sitəmlər yurduma qəsdir.

Zəngəzur sağdırsa ,o sənə bəsdir,

“Günəş parçasıdır, nurdu Zəngəzur!