Vaqif

Vaqif

(istəkli şagirdim Vaqif Bayramova)

Çox şükür yetişdim 55 sinnə,

Bir az da böyüdün gözümdə, Vaqif.

Hər dəfə şad xəbər eşidəndə mən,

Bir qürur duyuram özümdə, Vaqif.

O eldən-obadan güc aldı mən də.

Nadandan,naşıdan bac aldım mən də.

Vətən deyə-deyə qocaldım mən də,

Taqətim qalmayıb dizimdə , Vaqif

Gözümü yollara nə qədər dikim?

Nə qədər Vətənin dərdini çəkdim.

Təbib yoxa çıxıb,tapılmır həkim,

Azalır canımda dözüm də Vaqif

İnsan haqqa dönər düşəndə dara,

Həmişə, hər yerdə gəlmisən kara.

Nifrət yağdırıram mərdimazara,

Zərrəcə xilaf yox sözümdə,Vaqif

Mənim nəyim var ki, sözdən savayı

Haqdan ,ədalətdən düzdən savayı.

Kim yurdu itirib bizdən savayı,

Yurdumdan silinir izim də, Vaqif

Tanrı nəzərini səndən əyməsin

Bədnəzər baxışı sənə dəyməsin

Qapını heç vədə hicran döyməsin,

Namərd yurd salmasın düzündə, Vaqif

Yurdumun üstündən bu duman keçə,

Könlümü oxşayan xoş zaman keçə

Ömür vəfa qıla əcəl yan keçə

Yaşayaq ,görüşək yüzündə, Vaqif

Əvəz, qismət ola dönək Vətənə,

Bizi həsrət qoyub fələk Vətənə.

Əsməsin qara yel. külək Vətənə,

Kədər görünməsin üzündə , Vaqif

                                                                      16.04.2013