Dağlar

Dağlar

Ustad Ələsgərin telli sazından,

Məni bu yerlərə gətirən, dağlar.

Bu loğman havadı,  bu sərin sudu,

Üstümdən dərd-qəmi götürən dağlar.

Gəldin halallaşaq ömrün qış çağı,

Sellərin, suların durulmaz çağı.

Hünər köhlənimin yorulmaz çağı,

Məni aşırımdan ötürün, dağlar.

Ya nəsib, ya qismət bir də gəlim mən,

Çeşmələr başında deyib-gülüm mən.

Istərəm qoynunda qalıb ölüm mən,

Əvəzi arzuya yetirin, dağlar.